MALAYBALAY CITY, Pebrero 22 (PIA)—Kapin sa 125 ka-pamilya, kadaghanan lumad, ang nakadawat sa ‘food packs’ gikan sa Department of Social Welfare and Development (DSWD) nga dunay sulod nga mga kape, cereal mix, unom (6) ka kilo nga bugas, ug mga “ready-to-eat” nga de lata o mga ‘canned goods.’
Kini nga kalihukan gipaningkamotan sa 1003rd Ready Reserve Battalion Task Force (RRBnTF)-10th Regional Community Defense Group (RCDG) kauban ang 8th Infantry Battalion (8IB) sa 403rd Brigade, Philippine Army—pinaagi sa tabang sa DSWD ug uban pa nga mga grupo—aron matabangan gyud ang mga kaigsoonan sa Sitio Tigbawan, Barangay Can-ayan ug Sitio Minahan, Barangay 9 nga nahimutang sa hilit nga mga lugar sa syudad sa Malaybalay.
“Kini nga Gift-giving usa ka 'Post Valentine Celebration' nga kabahin pa niadtong Pebrero 14 ug alayon usab sa selebrasyon sa ika-54th Anniversary sa 1003rd RRBnTF karong umaabot Marso 1, 2021,” matud ni 10th RCDG Commander Col. Eduardo Monjardin.
Ubos sa tema nga "Transcending Pandemic: Give Love on Hearts’ Day, 10RCDG Pusong Maaasahan sa Tulong at Serbisyo!" gituyo pagbisita sa mga sundalo ang hilit nga mga komunidad sa nasud aron mahimong kaabag sa kalambo-an ug kalinaw kon ‘partners in community development and peace-building.’
Si DSWD-10 Regional Director Mari-Flor A. Dollaga, sa iyang pakigpulong, miingon nga ang aktibidad nagpamatuod lang nga ang gobyerno andam motabang bisan sa pinakalayo nga mga lugar sa nasud.
“Nia mi dinhi karon aron mahatud namo ang hinabang gikan sa gobyerno, pinaagi sa DSWD, ug among mapakita sa inyo nga wala gyud mo gipasagdan sa gobyerno. Hinaut unta nga pinaagi aning gamay nga hinabang maramdaman ninyo nga importante kaayo ang inyong ‘role’ sa katilingban,” matud ni Dollaga.
Tungod sa kaayohan nga gihatud sa kasundalohan ug DSWD, mipasalamat ug dako ang Kapitan sa Can-ayan nga si Punong Barangay Rommel Seblian tungod kay sa pipila ka tuig na daw nga milabay, ayha pa sila nakadawat sa nasangpit nga hinabang.
"Karong adlawa, mapasalamaton kaayo ‘ta tungod kay bisan sa ka-layo sa atong lugar, gihatud gyod sa DSWD ug sa Army ang mga pagkaon ug uban pang mga grasya. Gi-deliver gyud nila dinhi sa Sitio Tigbawan ug Sitio Minahan kini nga mga kaayohan. Busa atong pasalamatan ang gobyerno kay ato gyod nakita nga wala kita nila pasagdi," matud sa Barangay Kapitan.
Sa samang higayon, gi-awhag ni Major Lemuel Bacarro sa 8IB, ang mga benepisyaryo nga naay mga paryente o higala nga mga rebelde, nga kumbinsihon nila ang ilang mga higala o paryente nga mo-surender na tungod kay daghan pa ang mga programa sa gobyerno nga naghulat kanila labi na ang programa nga E- CLIP. (BGE/PIA-Bukidnon)
Source: Philippines Information Agency (pia.gov.ph)
0 Comments