DAKBAYAN SA BUTUAN, Pebrero 1 -- Gi-turn over sa probinsyal nga panggamhanan sa Agusan del Norte ang kapin sa P9 milyones nga covered court sa Barangay Marcos Calo, Las Nieves.
Ang maong covered court usa sa mga gikinahanglan facilities alang sa paugnat sa kusog, ug panagtigum ug isip evacuation center panahon sa kalamidad, usa sa mga nakitang panginahanglanon sa mga residente sa barangay ug apil sa mga priorities ubos sa Hiniusang Lihuk Agusan Flagship Program sa AGUSAN UP!, ang kampanya sa pagpalambo sa administrasyon ni Gob. Dale B. Corvera inabagan sa buhatan ni Kongresista Angel Amante-Matba.
“Pasalamat jud ko ni Gob. Corvera ug Kong. Angel kay dugay najud namo ni nga pangandoy nga matagaan gyud mi og sakto nga covered court kay gumikan ang atong mga kabatan-onan mabusy na sila sa sports ug ingkaso adunay kalamidad ato usab himuon nga evacuation area,” sumala pa ni Kapitan Salazar A. Barnaja sa barangay Marcos Calo.
Gibutyag ni Kapitan Barnaja nga gama sa kahoy lamang ang ilang gigamit nga materyales sa ilang gamay nga covered court kaniadto hinungdan nga nangandoy sila sa usa ka pasilidad nga sama sa gi-inagurahan nila ning adlawa.
Wala usab mag duha-duha pagpadangat sa maong proyekto sila si Gob. Corvera ug Kong. Amante-Matba tungod nakita nila ang panaghiusa sa mga opisyales sa maong barangay, sumala pa ni Provincial Administrator Gerry Joey Laurito, representante ni Gob. Corvera sa maong inagurasyon
Sa mensahe ni Provincial Administrator Laurito, mihangyo siya sa mga opisyal ug lumulupyo sa barangay nga atimanon gyod nila nga mamintinar ang kalimpyo sa lugar aron mahimo kining malahutayon.
Gawas sa gi-turn over nga covered court, gipadangat usab sa probinsya ang fiber glass nga basketball ring. Plano usab sa probinsya nga ayohon ang kalsada padulong sa mismo barangay. (Karen Kie V. Decamotan, Agusan Up, LGU Agusan del Norte/PIA Agusan del Norte)
Source: Philippines Information Agency (pia.gov.ph)
0 Comments