MISAMIS ORIENTAL, Feb. 24 - Dako ang pasalamat sa 16 ka mga kanhi rebelde nga nibalik na sa sabakan sa gobyerno ngadto sa panggamhanang probinsyal sa Misamis Oriental sa kanunay nga paghatag kanila og suporta ug kumpyansa nga magpuyo nga puno sa paglaom uban sa komunidad.
Niadtong Pebrero 17, 2021 balor P80,000 nga ayudang pinansyal ang gitunol sa probinsya pinaagi sa buhatan sa Provincial Social Welfare and Development (PSWDO) ngadto sa mga kanhing rebelde nga gipahigayon diha sa 58’th Infantry Battalion Headquarters nga nahimutang sa Migbanday, Claveria ning lalawigan.
Si Major Hermilando T. Corvera, ang Executive Officer sa 58’th Infantry Battalion mipadayag sa iyang pagdayeg ngadto sa pagdumala sa Gobernador nga mapreserba ang kahapsay ug kalinaw.
Kahinumdoman nga sa miaging bulan sa Enero 2021, nagpahigayon ang PSWDO ug profiling ngadto sa mga kanhi rebelde aron sa pagsuta sa ilang panginahanglanon. Gawas sa counseling nga gipahigayon alang sa mga former rebels, dako sab og kahimoan ang ayudang pinansyal sa ilang panginabuhian.
Pinaagi sa tabang sa Department of Interior and Local Government (DILG), ang pangagamhanang probinsyal sa MisOr padayong gipanghingusgan ang Enhanced Comprehensive Local Integration Program (ECLIP) aron sa tunhay nga pamuyo sa mga former rebels.
Kanunay nga gipanawagan ni Gobernador Bambi nga andam ang kagamhanan sa pagdawat sa mga anaa sa kabukiran nga bout mobalik sa sabakan sa gobyerno kay ang iyang administrasyon anaa mosuporta, mogiya nga sila mobalik sa normal nga pagpuyo ug malinawon uban sa komunidad. (MisOr IO)
Source: Philippines Information Agency (pia.gov.ph)
0 Comments