CAMIGUIN, Mar. 3 (PIA)—Sa pagpagawas sa Inter Agency Task Force (IATF) Resolution No. 101, Pebrero 26, si Gob. Jurdin Jesus Romualdo miisyu sa Executive Order No. 75 series of 2021 o sa kamanduan nga nagkinahanglan ug COVID-19 testing sa mga mubyahe padulong sa probinsya.
Sa maong EO, ang mga mubyahe sa probinsya alang sa mahinungdanon or aduna’y kalambigitan sa trabaho, kinahanglan magpakita ug negatibo nga resulta sa ilang reverse transcription polymerase chain reaction (RT-PCR) nga nakuha sulod sa 24 ka oras sa usa ka lisensyadong pasilidad.
Ang mga mubyahe nga dili makatuman sa maong kamanduan dili ipasulod sa probinsya, gawas kung pilion nila nga mupailawom sa 14 ka adlaw nga kuwarantin ug sa lugar nga gipili sa awtoridad sa panglawas.
“EO 75 shall not be interpreted to allow travel to the province for non-essential, leisure, and tourism purposes, which the Provincial Government does not yet permit and which shall be the subject of other executive orders and/or ordinances,” miingon si Romualdo.
(Ang EO 75 dili dapat isipon nga gitugtan na ang pagbyahe sa probinsya alang sa dili mahinungdanon, kalingawan, ug alang sa turismong kalihukan, diin wala pa gitugtan sa Pangagamhanang Lokal sa Camiguin, ug hilisgutan pa sa laing executive orders o mga ordinansa)
Sa mga isyu nga gahisgutan sa authorized persons outside of residence (APORs) kabahin sa kamahal sa bayranon sa RT-PCR, giingon ni Romualdo nga gakinahanglan na lamang ang probinsya sa antigen testing gikan sa mga empleyado sa gobyerno. Kini human usab nakarekord ang probinsya ug ubay-ubay nga mga kumpirmadong kaso sa COVID-19 sa maong sektor.
Samtang gahulat pa sa antigen test kits, ang LGU temporaryong mugamit sa rapid tests. “Kung positive ka sa antigen, diretso dayon ka i-RT-PCR, hulatan ang results then you have the choice kung diri ka mag-quarantine or muuli ka,” giingon sa gobernador.
Gipasabot ni Romualdo nga gabuhaton nila ang maong kamanduan tungod kay 10 lamang ang COVID-19 nga mga katre ug 10 lang ang ventilators sa probinsya. Rason nga maglisod pagdumala ang probinsya sa daghan kaayo nga pasyente sa COVID-19 labi na katong grabe ang kondisyon.
Sa pagpalit sa bakuna batok COVID-19, miingon si Romualdo nga naggahin ang probinsya ug P30 milyones, ang Mambajao nag-alokar ug P6 milyones, ug ang upat ka munisipyo nag-aklokar ug tag-P1 milyon matag usa. Ang Camiguin aduna’y P40 milyon nga kinatibuk-ang badyet alang sa bakuna.
Alang sa plano sa pagbukas alang sa turismo, si Romualdo miingon nga ang probinsya maglusad sa Safe and Clean Camiguin Quick Response (QR) code nga muhaum sa aplikasyon nga gagamiton sa Department of Health (DOH) nga mu-monitor sa mga kalihukan sa mga tao sa lain-laing lugar.
Base sa datos, Marso 2, ang probinsya nakatala ug lima ka kumpirmadong kaso sa COVID-19 nga gipahimutang sa isolation units sa Mambajao ug Mahinog. Aduna’y 268 nga mga taong aduna’y history of travel o COVID-19 exposure diin 216 ang gikan sa Mambajao, Mahinog (22), Guinsiliban (8), Sagay (2), ug Catarman (20). (RTP/PIA10)
Source: Philippines Information Agency (pia.gov.ph)
0 Comments