Kinaray-a News: DSWD nagpahanumdom sa mayad nga paggamit kang 4Ps nga bulig

SAN JOSE, Antique, Marso 31 (PIA) -- Nagpahanumdum ang Department of Social Welfare and Development (DSWD) sa mga benepisyaryo kang andang programa nga Pantawid Pamilyang Pilipino Program (4Ps)  nga gamiton ang bulig pinansyal kang mayad para sa andang pamilya.

Sa sangka interbyu, ginpahayag ni DSWD-6 Pantawid Pamilya Division Chief Belen Gebusion nga nagapatuman ang gobyerno kang istrikto nga mga pagsurondan agud mapasiguro nga ang mga resources kadya magamit sa insakto nga pamaagi, ilabi run gid sa pagsuporta kang mga kinahanglanon sa patag kang edukasyon, kaayong lawas, kag iban pa nga mga importante nga bagay

Ginpakigbahin man ni Gebusion nga may mga pahibalo kun sa diin ginagamit kang mga panimalay ang bulig pinansyal kang 4Ps sa andang mga iligal nga pangbuluhaton.

Nagtipon ang 32 ka mga pamilya nga benepisyaryo kang 4Ps sa banwa kang Antique para sa andang nahauna nga gradwasyon kang programa kang DSWD. (pia6-LML)

Angot kadya, ang DSWD nag-isyu kang Memorandum Circular 38 nga nagapatpat kang mga ginadumili-an nga mga akto kang mga benepisyaryo sa panahon kang kalamidad kag emerhensya nga pang-nasyonal.

Suno kay Gebusion, pagadisiplinahon ang kutob sa mga benepisyaryo kang Pantawid nga madakpan nga gasugal ukon nagabakal kang makahulubog nga irimnon.

Sa pagpatigayon kang 4Ps, ginalauman ang mga panimalay nga sakop kang kadya nga programa nga mangin responsable kag masinulundon sa mga kondisyon nga may kaangtanan sa andang Oath of Commitment.

Kabahin kang mga kondisyon kang 4Ps amo ang masunod: pagtambong kang mga family development sessions, pag-eskwela kang mga kabataan, kag pag-abay sa iban pa nga mga hirikuton kang DSWD.

Padayon sa gihapon ang pag-monitor kang DSWD kang 4Ps sa bahin nga ang andang mga program implementers nagabulig sa pagresolba kang mga nanuhay tuhay nga mga isyu kun andut nabudlayan sanda sa pagsunod kang mga kondisyon kang programa.

Sa pihak nga bahin, nagpabutyag kang paglaum si Provincial Social Welfare Development Officer Lazaro Petinglay nga ang 4Ps sangka programa nga makatugro kang bahol nga impact sa komonidad nalakip na ang mga family development sessions nga nagatudlo kang pagkaresponsable kang mga ginikanan kag pagka mangin mabinungahon nga mga pumuluyo.

Sa madumduman, nagbisita ang mga program implementers kang DSWD-6 4Ps sa banwa kang Anini-y angot sa ginpatigayon nga gradwasyon kang 32 ka Pantawid nga mga pamilya. (JSC/LML/PIA6 Antique)      

 

Source: Philippines Information Agency (pia.gov.ph)