Cebuano News: Bohol Capitol sarado Abril 29 taman Abril 30 alang sa disinfection

Sukad alas 7 sa buntag sa Abril 29, 2021, ang lalawigan nakatala og 114 ka bag-ong mga kaso sa COVID-19 gikan sa 551 swab samples nga gi-proseso sa molecular laboratory of Gov. Celestino Gallares Memorial Hospital (GCGMH) sa syudad sa Tagbilaran. 

TAGBILARAN CITY, April 29 (PIA) -- Isip agresibong paningkamot sa pagpugong sa pagkuyanap sa coronavirus disease (COVID-19) ilabi na sa mga workstations, gisarado na usab ang Bohol Provincial Capitol alang sa hingpit nga pagpahigayon og disinfection sa Provincial Health Office (PHO).

Agi og pagsunod sa mando ni Gob. Arthur Yap, gi-suspendir ang trabaho sugod Abril 29 taman Abril 30, 2021, sa Provincial Capitol Building apil na ang mga extension offices niini sa syudad sa Tagbilaran.

Ang tanang capitol-based employees gimanduan sa pagsunod sa work from home arrangement sa maong mga petsa, gawas sa mga na-assign sa field o sa emergency response.

Ibalik ang regular nga operasyon sa Kapitolyo sa Lunes, Mayo 3, 2021.

Sa radio interview Huwebes sa buntag, ang gobernador miingon nga ang nagkasakang COVID-19 virus infection sa mga kawani sa Kapitol maoy nakapa-aghat sa duha  ka adlaw nga pagpasarado sa Kapitolyo alang sa hingpit nga pagpahigayon sa disinfection.

Sukad Huwebes sa buntag, may kinatibuk-ang  51 ka empleyado sa Kapitolyo ang nagpositibo sa COVID-19. Kini naglakip sa 17 gikan sa General Services Office, 17 gikan sa Provincial Treasurer’s Office, Provincial Accounting – 5, Provincial Budget Office – 6, Governor’s Office – 4; ug tag-1 sa Vice Governor’s Office ug Bohol Environment and Management Office.

Huwebes sa buntag, ang lalawigan nakatala og 114 ka bag-ong mga kaso sa COVID-19 gikan sa 551 swab samples nga gi-proseso sa molecular laboratory sa Gov. Celestino Gallares Memorial Hospital (GCGMH) sa syudad sa Tagbilaran.

Sukad alas 7 sa buntag, Abril 29, ang Bohol nakatala og ginatibuk-ang 2,684 ka kumpirmadong kaso sa COVID-19, diin 1,809 ang nangaayo na ug 40 ang namatay.

Niadtong Abril 23, 2021, ang Bohol Provincial Capitol ug ang Tagbilaran City Hall gisarado usab alang sa disinfection isip parte sa paningkamot nga mapugngan ang pagkatap sa COVID-19 tungod sa pipila ka empleyado sa duha  ka buhatan sa gobyerno ang nagpositibo sa COVID-19 virus.

Subling gipanawagan sa Kagamhanang Probinsyal sa Bohol ang estriktong pagsunod sa health protocols tungod sa padayong pagsaka sa kaso sa COVID-19 sa lalawigan. (ecb/PIA7-Bohol) 

Source: Philippines Information Agency (pia.gov.ph)