Cebuano News: Mga kawani sa gobyerno nga nalambigit sa korapsyon, pasakaan og kaso sa PACC

Matud pa ni PACC chairperson Greco Belgica nga kining lakang resulta sa mas gihingosgang kampanya ni Presidente Rodrigo Roa Duterte batok sa korapsyon nga ila usab nga gipatuman. (PIA)

TAGBILARAN CITY, April 29 (PIA)--Nag-andam na ang Presidential Anti-Corruption Commission (PACC) sa ipasakang kaso niini batok sa pipila ka opisyal sa gobyerno nga nalambigit sa korapsyon.

Sa programang Laging Handa Public Briefing sa Presidential Communications Operations Office (PCOO) niadtong Abril 27, gibutyag ni PACC chairperson Greco Belgica nga gihulat na lang niini nga mobalik ang operasyon sa Office of the Ombudsman nga temporaryong gisarado tungod sa pipila ka kawani sa buhatan ang nagpositibo sa coronavirus disease (COVID-19).

“Inaabangan lang namin ang muling pagbubukas ng Ombudsman at kami ay magsasampa ng kaso laban sa isang Presidential appointee. It involves hundreds of million pesos,” pagbutyag ni Belgica.

Matud pa ni Belgica nga kining lakang resulta sa mas gihingosgang kampanya ni Presidente Rodrigo Roa Duterte batok sa korapsyon nga ila usab nga gipatuman.

Giingong possible nga sa sunod semana na mapasaka ang kaso batok sa mga korap nga opiyal sa gobyerno. Apan wala usab gibutyag sa opisyal  ang mga pangalan sa mga giingong high-ranking officials.

Matud pa nga pipila kanila ang nagpuyo nga maluho ug dili haum sa ilang binuwan nga kita.

Pahayag pa ni Belgica nga daku ang nawalang salapi sa gobyerno tungod sa korapsyon nga angay unta magamit na lang alang sa COVID-19 pandemic response sa nasod.

Matud pa nga may mga undersecretaries ang gipaubos karon sa lifestyle check apan wala kini gipanganlan pa ni Belgica.

Dugang pa niini nga magtutok ang PACC sa mga presidential appointees nga may dili mapasabot nga katigayonan. (ecb/PIA7-Bohol)

 

Source: Philippines Information Agency (pia.gov.ph)