DAKBAYAN SA BUTUAN, Abril 5 -- Giimplementar na ang pagsemento sa Alubihid-Manlangit Provincial Road (Phase ll), Barangay Alubihid, lungsod sa Buenavista nga mokabat sa P19,993,965.51 nga gigahin sa lokal nga panggamhanan sa Agusan del Norte.
Kini adunay gitas-on nga 1,890 linear meters.
Alang sa hapsay nga implementasyon sa maong proyekto gihatagan sa Sangguniang Panlalawigan pinaagi sa Sanggunian Resolution No. 092-2021, og otoridad si Gobernador Dale B. Corvera isip tubag sa hangyo niini pinaagi sa sulat pinitsahan Pebrero 17, 2021 nga hatagaan og pahanugot sa pagpirma sa ngalan sa probinsya tali sa JD-RG Construction nga maoy motrabaho sa maong proyekto.
Ang Manlangit usa ka sityo sa Barangay Alubihid nga nahimutang ibabaw sa bukid diin didto madungawan ang Buenavista ug Butuan City apil na ang Butuan Bay.
Giaprobahan sa 18th Sangguniang Panlalawigan sa Agusan del Norte, sa pagpanguna ni Bise Gobernador Ramon AG. Bungabong, ang maong proyekto tungod kay ang pag-improve/upgrade sa maong provincial road mahinungdanon kaayo ilabina panahon sa emergency aron sayon ug luwas ang pag-agi sa katawhan ug aron usab molambo ang ekonomiya sa maong dapit.
Ang Sanggunian Resolution No. 092-2021 nga naghatag og otoridad sa pagpirma sa Contract Agreement gipangamahanan nila Provincial Board Member James T. Reserva ug Provincial Board Member Dick Victor B. Carmona isip principal authors, ug naaprobahan atol sa ika 79 nga sesyon regular kaniadtong Marso 1. (Jessica O. Mellejor. LGU Agusan del Norte/PIA Agusan del Norte)
Source: Philippines Information Agency (pia.gov.ph)
0 Comments