TAGBILARAN CITY, Bohol, April 29 (PIA) -- Subay sa gikatakda nga pagsira sa mga kadalanan sa Tagbilaran aron pag-pugong sa pagdagsang sa mga katawhan sa pista, may mandu ang mga tinugyanan sa Dakbayan sa Tagbilaran ngadto sa mga drivers ug konduktor sa mga sakyanan nga nagbyahe-an sa Tagbilaran.
Sirad-an sa syudad ang mga entry roads sama sa Barangay Bool, Barangay San Isidro, Barangay cabawan, Barangay Manga, Causeway sa Poblacion 1 ug ang junction Mansasa, aron mapugngan ang pagdagsang sa mga tawo nga mamista ug magbutang sa mga katawhan sa dugang peligro.
Sa usa ka suwat pahibalo nga gilagdaan ni City Administrator Cathelyn Torremocha, Abril 28, matud ni Torremocha nga subay sa Executive Order No 12 series of 2021 kabahin sa pagahimoon nga closure sa mga dalan nga magpasulod sa syudad, gihangyo sa syudad ang mga drivers og conductor nga dili magpasakay sa mga pasahero sugod Mayo 1 sa may ala 12:01 sa kaadlawon ngadto na sa alas 11:59 sa gabii sa Mayo 1.
Hinuon, gibutyag sa Administrador nga palutson ra ang mga indibidwal nga makapakita og government ID nga may Tagbilaran City Address, mga health workers ilabi na sa mga frontliners, tag-iya, empleyado sa mga balay patigayon nga nahimutang sa Tagbilarano kadtong naa sa duol nga munisipalidad nga kinahanglang moagi sa Tagbilaran City padung ngadto sa trabaho.
Sa mandu, palutson gihapon ang mga indibidwal nga moagi sa dakbayan sa Tagbolaran paingon sa ilang mga destinasyon, mga opisyales sa goberno ug kadtong naa sa medical emergency.
As Abril 28 pa lamang, 50 na ka mga trabahante sa Business Process Outsourcing nga tanan nia dinhi sa Tagbilaran mahimutang, ang natakdan sa sakit.
Gawas sa 50 ka BPO, may 32 ka piniriso ug 185 ka residente ang nasakit sa COVID ug anaa na sa ilang mga tagsatagsa ka isolation facilities o sa mga balay ug gipang monitor sa mga tinugyanan.
Niini nga kadaghanan, dili pa gyud piho sa syudad kon wala bay mga naglakawlakaw nga mga natakdan na apan wala pa matesting, bisan pa sa mass testing nga gihimo dinhi.
Niini, tataw nga kon may magpadayon sa pagpamista, aduna gayu’y mapaabut nga dugang pang pagsaka sa mga kaso.
Abril 28, nanguna pa gihapon ang Tagbilaran sa mga kaso, sunod na ang Dauis nga may 57 ka aktibong kaso.
Sa Tubigon, namatikdan na ang 33 ka kaso ug sa Lila ug Maribojoc, may tag 30 ka kaso didto.
Sa Baclayon, aduna silay 27 ka kaso, 22 usab ang sa Loon, 19 ang sa Candijay, 18 ang Cortes ug Sevilla samtang 17 ang Sierra Bullones. (rahc/PIA-7/Bohol)
Source: Philippines Information Agency (pia.gov.ph)
0 Comments