Cebuano News: 1,594 Bohol tourism stakeholders modawat og P5K sa DOT DOLE CAMP

TAGBILARAN CITY, Bohol, April 29 (PIA) -- Kinatibuk-an nga 1,594 ka mga trabahante ug stakeholders sa sector sa turismo dinhi sa Bohol ang gipaabut nga modawat sa tag P5,000 nga cash assistance karong Abri 30, 2021.

Ang 1594 ka mga benepisaryo, una na nga lakip sa 22,407 ka mga trabahante sa sector sa turismo gikan sa 1428 ka mga establisemento, kahugpungan, organisasyon ug mga kapunungan sa Central Visayas lakip na ang 886 ka mga tourism workers nga indibidwal nga mingduso sa ilang application sa COVID Adjustment Measures Program (CAMP) sa Department of Labor and Employment ug sa Department of Tourism (DOT DOLE CAMP).

APEKTADO USAB ANG MGA COMMUNITY-BASED TOURISM. Bisan kon mahimo ra nga magsalig sa lokal nga mga manuroyay, alkanse pa gihapon ang community-based tourism sama sa Lamanoc Mystical Island Tours sa Anda Bohol. (rahc/PIA-7/Bohol)

Segun pa sa DOT Central Visayas, P 116,465,000 ang kinatibuk-ang pundo nga ihatag alang sa nahisgutan nga mga trabahante gikan sa Bayanihan To Recover as One nga gipaagi sa DOLE. 

Sa DOLE Deparment Order 218, nakabutang didto ang mandu usab alang sa DOT sa paghatag og hinabang alang sa apektado nga DOT accredited primary ug secondary enterprises. 

Sa Bohol mismo, kinatibuk-ang 8,513 ka trabahante sa sector ang giaprobahan sa hinabang sa DOLE 7 ug kini nagkantidad sa P 42,565,000.00.

Samtang daghan na nga mga benepisaryo nga establisemento, trabahante ug ubang serbisyo nga habig sa turismo ang nahatagan na sa hinabang, ang DOLE nagpadayon pa sa pag process sa ubang mga aplikasyon.

Sa datus sa Abril 21, 2021, 9,625 pa ka trabahante sa sector ang modawat pa sa hinabang sa Central Visayas ug ang 1,594 niini, ihatag karong Biyernes Abril 30, 2021.

Sa modawat sa Bohol, 411 niini ang gikan sa Alturas mall Supermarket (Tourism Support ServicesCategory), 43 sa Balicasag Island Dive Resort, (Primary establishment- Resort), 54 ka sakop sa Bohol Persons with Disability Workers Association Inc. sa Community Based Tourism Organization.

Laing 113 ang modawat nga sakop sa Bohol Tourist MultiPurpose Cooperative (Community Based Tourism Organization), 26 gikan sa Cambuhat Enterprise Development and Fisheries Association (Community Based Tourism Organization), 68 gikan sa Candijay Integrated Small Transport and Workers Association (Tourism Support Services).

May 37 usab ka trabahante sa CS Village Resto (Secondary Enterprise- Resturant), 61 gikan sa Dumaluan Beach Corporation (Primary Enterprise- Resort), 345 sa Island City Mall (Tourism Support Services). 

May 96 usab ka trabahante gikan sa JJS Foodland Corporation (Secondary – Restaurant) 51 sa Korea Universal Building Corp., (Primary Establishment- Hotel), ug 102 sa Marcela Farms Incorporated (Tourism Support Services).

Ang Ocean Fast ferries Inc. (Primary – Transportation) may 34 ka benepisaryo, ang Pamilacan Dolphin and Whale Watching Tours (Community Based Tourism Organization) may 58 na benepisaryo, ang Rio Verde Floating Reso Inc. (Secondary – Restaurant) may 64 ug ang Suba Pumpboat Operators and Owners Association (Community Based Tourism Organization) may 31. (rahc/PIA-7/Bohol)

Source: Philippines Information Agency (pia.gov.ph)