Ilusad sa gobyerno sa Abril 30 ang online system nga mokolekta sa demographic data sa mga magpalista sa National Identification System aron mapadali na ang pagparehistro sa publiko. (PSA)
TAGBILARAN CITY, April 28 (PIA) -- Buksan na usab sa gobyerno ang online registration alang sa National Identification System.
Kini ang gikumpirmar ni National Economic and Development Authority (NEDA) Kalihim Karl Chua.
Matud pa ni Chua, ilusad sa Abril 30 ang online system nga mokolekta sa demographic data sa mga magpalista sa national ID aron mapadali na ang pagparehistro sa publiko.
Paghidangat usab sa buwan sa Mayo, giingong sugdan na ang issuance ug pagpanghatag sa Philsys number ug ID card.
Apan giklaro ni Chua nga kinahanglan pa gihapon moadto ang mga aplikante sa registration centers aron makuhaan og biometrics apil na usab ang pagbukas sa ilang bank accounts.
Niadtong Abril 17, nikabat sa 30.7 milyong Pilipino ang nakapatala sa unang step sa national ID registration, diin 4.4 milyon ang nakahuman na usab sa step 2 o sa biometrics.
Gitumbok usab sa kalihim nga 42 porsyento sa mga nakaparehistro na o 1.85 milyong registrants ang nakapaabli na usab og bank account sa Landbank.
Malaumon ang NEDA nga daku ang matabang sa national ID aron mapadali ang vaccination program apil na ang paghatod og tabang pinansyal sa panahon sa lockdown ug apil na usab ang makatabang sa low income families nga makabukas sa ilang bank accounts. (ecb/PIA7-Bohol)
Source: Philippines Information Agency (pia.gov.ph)
0 Comments