Aklanon News: Libre nga WiFi mabahoe nga bulig sa tyempo it pandemya

KALIBO, Aklan, Mayo 29 (PIA) --  Ro Free WiFi For All nga programa it Department of Information and Communications Technology (DICT) nga ginlunsar kurundaya eamang sa Aklan hay mabahoe ro ikabulig sa probinsya ag sa mga Aklanon sa tyempo it pagpangatubang sa COVID-19 nga pandemya.

Para kay Governor Florencio T. Miraflores, kon siin ro anang mensahe hay ginbasa para kana ni Atty. Selwyn Ibarreta, Provincial Administrator sa ginpatigayon nga “virtual” nga paglunsar, ginbag-o it COVID-19 ro mga pamaagi sa pagpatigayon it edukasyon ag sari-saring mga serbisyo it gobyerno sa komunidad pero sa bulig it “internet connectivity”, nasustinir ro pagpanirbisyo sa publiko it gobyerno.

Suno sa mga opisyales it probinsya it Aklan pareho kay Governor Florencio T. Miraflores, ro pagtao sa Aklan it libre nga WiFi it Department of Information and Communications Technology (DICT) hay mabahoe ro ikabulig sa pag sustinir sa mga programa ag serbisyo it gobyerno nga kinahangean gid ro "internet connectivity" sa tyempo ngara nga may COVID-19 nga pandemya. (PIA Aklan)

Gintao nana kara nga ehmplo ro “blended modular learning” sa patag it edukasyon, ro pagpangunsulta sa mga doktor, pagpabueong ag pag-abang kontra sa mga masakit paagi sa “online” nga pamaagi, sa pag-usoy sa mga tawo nga naka iba ro mga pasyenteng nag positibo sa COVID-19, ag sa pagpatuman it mga “minimum public health standards” agud malikawan ro pageapnaag it COVID-19.

Ginmitlang man nana nga paagi sa “internet connectivity”, ro pag proseso it mga PhilHealth claims hay madasig eon, imaw man ro pagpadaea it mga kinahangeanon nga report it probinsya sa Department of Health (DOH).

Nagpasaeamat gid si Miraflores sa DICT bangud sa pagpadasig it pag implementar ku proyekto ngara it  ag pag realisar kara.

Sa parte ni Mayor Emerson Lachica it banwang Kalibo, ginhambae nana nga ro paglunsar it programa ngara hay sangka mabahoe nga tikang agud ro mga pumueuyo hay makasagap it mga balita  sa Pilipinas ag sa bilog nga kalibutan.

Gindugang pa gid nana nga ro pagbutang it libre nga WiFi hay magasolbar sa problema sa pagiging patas it tunga it may una nga WiFi ag sa mga owa.

Sa Kalibo, pila sa mga lugar nga may libre nga WiFi hay ro Pastrana Park, Dr. Rafael S. Tumbokon Memorial Hospital (DRSTMH), ag Aklan State University (ASU) Kalibo Campus.

Ro iba pa gid nga mga campus it ASU nga una sa Banga (main), Ibajay, Makato ag New Washington hay mga free WiFi sites man ag hambae ni Dr. Emily Arangote, Presidente it ASU, mabahoe gid ro pagpasaeamat it unibersidad  nga raya hay sambilog sa benefisyaryo it programa.

Ginhambae nana nga sa makaron, ro pag angkon it internet hay bukon eon it “luxury” kundi nesisidad para sa kada Pilipino nga gusto magtuon, magtrabaho, ukon magpaabot it mga impormasyon sa oras it krisis.

Samtang, si Dr. Paul Macahilas, hepe it DRSTMH, hay naghambae nga ro libre nga WIFI hay makapakinot sa mga health workers ag imaw man sa mga pasyente, nga nagagasto agud makabakae it cellcards para maka konektar sa andang mga igbata ag iba pa.

Ro paglunsar it programa sa Aklan nga ika ap-at (4th) sa serye it mga paglunsar sa Western visayas hay gintambungan man ni DICT Secretary Gregorio Honasan ag iba pang mga opisyales it departamento, ag halin man sa DICT regional  ag provincial nga mga opisina.  (JSC/VGV/PIA6 Aklan)

Source: Philippines Information Agency (pia.gov.ph)