CORTES, Bohol, May 2 (PIA) -- Gisubhan dayun sa usa ka kamatayon dala sa coronavirus disease (COVID-19) ang pagbukas sa una nga adlaw sa Mayo, kanus-a saulogon sa mga Bol-anon ang kapin sa usa ka buwan nga pagsalosalo.
Ang sakit nga labing gikahadlokan, temporaryo na nga nakapausab sa mga kinaiya sa mga tawo, ilabi na sa naandan na nga pagsaulog sa pista, nga usa sa mga di ikasalikway nga kinaiya sa mga Bol-anon.
Sa katapusang duha ka buwan, sa kinatibuk-an nga 41 ka mga Bol-anong kinabuhi nga nakalas tungod sa COVID-19, 18 na ka kinabuhi ang nakalas.
Kahinumduman nga sa buwan sa Marso, 5 ka kinabuhi ang nabugto tungod sa COVID, samtang sa buwan sa Abril, 13 na usab ka kinabuhi ang nakalas.
Ang mas makapaguol niini, kay sa katapusang duha ka buwan lamang natala ang katunga sa kadaghanon sa nangamatay kon itandi sa milabay nga usa ka tuig.
Sa sunod usab nga mga adlaw, mas gikahadlokan nga dala na sa kapuol sa mga tawo sa pagtuman sa mga lagda aron mapanalipdan sa sakit, daghan na ang namatikdan nga milibkas na sa ilang panalipod.
Mahimo nga kini dala sa sayop nga pagtuo nga ang COVID dili na kahadlokan, kay ania na miabut ang bakuna.
Apan gipasabut ni Dr. Fruserma Mary Uy, medical specialist nga anaa sa Bohol Provincial Health Office, bisan pa kon mabakunahan, dili pa piho kon dili na ba gayud matakdan kay may mga natakdan na, apan wala na makagrabe ang ilang mga kahimtang.
Dugang ni Dr. Uy, gikinahanglan nga makompleto ang duha ka tupokan sa bakuna aron makompleto usab ang lig-on nga panalipod sa lawas.
Gani, dugang niyang gipasabut nga bisan sa pagkahuman sa ikaduha nga pagtupok sa bakuna, kinahanglan pa nga maghuwat sa 14 ka adlaw ayha pa ang bakuna makakompleto sa iyang gisaad nga panalipod sa lawas.
Sa snuod nga mga adlaw, segun sa kinaiya sa mga Bol-anon, may mga gitagna nga pagtapoktapok nga mahitabo dala sa pagpakighiusa sa pista.
Ang pista sa Bohol, gawas nga panahon sa pagsalosalo sa mga pagkaon ug ilimnon, paghinangpanay ug pagsandurotay, butang nga hugot nga gidili sa panahon nga wala pa mabuntog ang pagpangtakod sa kagaw.
Niini, may mga kalungsuran na nga nagpahimutang sa mga silo tug multa sa mga madakpan nga nagsalosalo nga giapilan sa lain nga mga tawo nga dili apil sa banay.
Gipangsiran na usab sa uban ang mga agi-anan aron pagpugong sa mga mamistahay samtang gidili ang pagpanapoktapok kay delikado sa pagtakod.
Sa Mayo 1, gawas nga 41 na ang namatay, mikabat sa 873 ang aktibong kaso sa COVID sa Bohol ug 871 niini ang kinaingnan mao ang pagtakod nga nakuha sa gikaduol. (rahc/PIA-7/Bohol)
Source: Philippines Information Agency (pia.gov.ph)
0 Comments