Cebuano News: Kaso’ng criminal, admin sa opisyal nga di kabadlong sa pagtapoktapok

CORTES, Bohol, May 10 (PIA) -- Kaso nga criminal o administratibo nga kaso ang ihapos alang sa mga local nga officials sa ilang pagkapakyas sa pagpugong sa pagtapoktapok sa mga katawhan, bahad sa Department of Interior and Local Government (DILG).

Dereliction of duty kini kon wala makapatuman ang mga local nga opisyales sa pagpatuman sa minimum health protocols , kini subay sa Revised Penal Code nga mahimong kaso nga criminal,  gawas pa sa administratibong salaod, dugang bahad sa DILG.

SERBISYONG HUMANITARIAN. Alang sa pagpatuman sa serbisyo nga magtunol sa ayuda sa katawhan nga anaa sa kalisud, gituguton ang pagtapok sa bisan unsa nga kalsipekasyon sa kwarantina. (PIA Bohol)   

Matud pa ni DILG Secretary Eduardo Ano, dili buot sa DILG nga moabut pa niining puntoha ang kagamhanan, mao nga unta makapatuman na sila sa mga polisiya sa mass gatherings subay sa unsa may quarantine classifications nga gipatigbabaw sa ilang mga lugar.

Subay sa guidelines nga gipagawas sa Inter-Agency Task Force Against COVID-19 niadtong Abril 15, gidili ang pagtapoktapok gawas ug sulod sa mga balay sa mga lugar nga ubos sa Enhanced Community Quarantine (ECQ), Modified ECQ (MECQ), ug General Community Quarantine (GCQ).

Sa mga lugar nga ubos sa Modified General Community Quarantine, gitugot man ang pagtapoktapok, apan kini alang lamang sa katunga sa kadaghanon sa kapasidad sa lugar nga gitapokan.

Hinuon, daghan ang mga local nga kagamhanan ang manglusot sa rason nga ang ilang gipatapok, alang kuno sa pagpang-apud-apod sa serbisyo sa kagamhanan ug sa gitugotan nga humanitarian activities, nga gitugot usab sa tanang lugar  ilawom sa ECQ, MECQ, GCQ, ug MGCQ.

Ang pagtapoktapok sama sa religious gatherings gidili sa mga lugar ubos sa ECQ, samtang gitugot kini sa mga lugar nga anaa sa MECQ subay sa 10 ngadto sa 30 porsyento nga seating capacity, subay usab sa pagtugot sa local nga kagamhanan.

Sa mga lugar nga ubos sa GCQ, mahimo kini basta naa lamang sa 30 ngadto sa 50 porsyento sa kapasidad sa lugar ang gitugotan.

Sa mga lugar nga ilawom sa MGCQ, mahimo kini basta sa katunga lamang sa kapasidad sa lugar ang mapuno.

Ang sa pagmisa sa patay ug serbisyo sa mga funeraria alang sa mga namatay sa COVID-19, kini tugotan sa mga lugar nga ubos sa ECQ ug MECQ apan alang lamang sa mga sakop sa banay sa namatay.

Sa mga luigar nga ubos sa GCQ, dili molapas sa 30 porsyento ngadto sa 50 porsyento sa kapasidad sa lugar ang makatambong samtang tugotan sa 50 porsyento nga kapasidad kon kini anaa sa lugar ubos sa MGCQ.

Subay niini, giaghat sa DILG ang publiko sa pagpasaka og kaso batok sa mga opisyales nga nakalapas sa lagda, ngadto sa DILG Regional Offices o sa DILG Emergency Operations Center sa dilgeoc.complaint@gmail.com o (02) 8876-3454 local 881 ngadto sa 884. (rahc/PIA-7/Bohol)

Source: Philippines Information Agency (pia.gov.ph)