Cebuano News: Mga na-ayo na sa COVID-19 dawaton kung may pagmatuod nga maayo na

ALANG SA PAGPAHIMSUG SA EKONOMIYA. Gipabuksan ang lalawigan sa Bohol alang sa mga buot mosulod aron makatabang sa pagpalagsik sa ekonomiya, kini bisan pa nga dagway og naglisud pa gihapon ang lalawigan sa pagkontrolar sa lokal nga pagpanakod sa sakit. (rahc/PIA Bohol)

TAGBILARAN CITY, Bohol, May 26(PIA) -- Tungod kay walay katungod ang lalawigan sa pagpugong sa mga residente ug mga tawo nga buot mosulod sa Bohol, gipagawas na sa gobernador ang mga gikinahanglang dokumento alang niadtong mga nasakit sa Coronavirus Disease (COVID), apan na-ayo na ug mopauli na nganhi.

PInaagi sa Bohol Executive Order No. 28, series of 2021, gisaysay ang mga hulip nga mga dokumentos nga magamit alang niadtong mga gikadeklara na sa mga doctor nga naayo na sa COVID, base sa Department of Health Department Order No. 2020-0512.

Sanglit mogawas man gayud nga positibo kadtong mga nasakit na sa COVID, mahimo nga inay ang negatibo nga resulta sa RT PCR nga nakuha 72 oras sa dili pa  mobyahe, kadtong naayo na sulod sa tulo ka buwan sa  wala pa mobyahe  mahimong mopakita sa positibo nga resulta sa RT PCR apan kinahanglang kini sulod pa sa tulo ka buwan sa gitumbok nga pagtabok sa Bohol.

Mahimo usab nga magdala siya sa Certification gikan sa usa  ka lisensyado nga doctor nga maoy nag-atiman sa pasyente nga siya naayo na.

Hinuon, kini nga certification, kinahanglang magsubay usab niining mga lagda:

Kadtong mga pasyente nga mipakita og yano nga kaso sa COVID, kinahanglang  nakakompleto sa 10 ka adlaw nga pag-isolate sa balay o sa temporaryong treatment ug monitoring facility, gikan sa unang adlaw nga mitumaw ang mga timailhan sa sakit  lakip na ang tulo ka adlaw nga siya naayo na o wala nay simtomas.

Kadtong mga pasyente nga nakasinati og medyo grabe nga mga simtomas , makakuhag Certification basta ngakakompleto na sa 21 ka adlaw nga isolation sa usa  ka ospital o tambalanan gikan sa unang adlaw pagpagawas sa mga simtomas, lakip na ang tulo ka adlaw nga siya gideklara nga naayo na ug wala nay simtomas.

Sa laing bahin, kadtong walay gipakita nga mga simtomas  nga giila nga immunocompetent ug nagkapositibo sa RT PCR test apan wala gihapoy lain nga gibati sa lawas, kinahanglang makakompleto sa 10 ka adlaw nga isolation gikan sa adlaw nga gikuha ang iyang swab sample, aron siya makakuha sa Certification, segun sa EO 28. (rahc/PIA-7/Bohol)

Source: Philippines Information Agency (pia.gov.ph)