Cebuano News: 'Pagpakita sa adlaw pagtupok, aron walay bakuna masayang' -DOH

CORTES, Bohol, May 5 (PIA) -- Kay nagnihit ang bakuna tungod kay ang tanang nasud sa kalibutan nanginahanglan niini, mahinungdanon gayud nga mosubay ang tanan sa ilang schedule sa adlaw sa ilang pagbakuna, aron walay bakuna nga masayang.

Kini maoy mitumaw awhag human nga kasayuran gikan sa Department of Health (DOH) sa gikataho nga may mga bakuna nga nausik tungod kay may mga wala mosanong sa ilang adlaw nga sila bakunahan. 

DILI MAHIMONG IGAWAS. Kinaiya sa mga bakuna nga kinahanglan kining tipigan sa bugnaw nga tipiganan aron dili madaut. Kon igawas kini, dili idugay og balik sa sulod kon dili na gamiton aron dili dayun madaut ug ihurot gayud og tupok sa usa ka adlaw ang inablihan nga vials. Kini usab ang kina-ingnan nga may bakuna nga maablihan apan sa kadyutay sa tawo nga mosipot sa adlaw sa pagpangbakuna, daghan na nga bakuna ang nausik. (PIA Bohol)

Gipasabut sa mga tinugyanan sa kasanihan nga sa adlaw sa pagpangbakuna, importante ang pag-andam og maayo sa bakuna ug sa pagpadangat niini gikan sa iyang tipiganan ngadto sa lugar bakunahan (Vaccination sites) aron walay bakuna nga madaut.

Ang bakuna, sensitibo kaayo kon magawas sa cold chain, ug mahimong kii angkina-ingan sa pagkadaut niini, segun sa ahensya. 

Sa Vaccine Cold Chain ug Logistics Management sa bakuna, gitahasan niini ang LGU health facility supervisor ug ang cold chain manager alang niini, segun pa sa Department of Health.

Kining mga nahisgutan nga mga hingtungdan maoy magseguro nga masunod ang mga gilatid nga lakang pagseguro nga dili madaut ug walay bakuna nga masayang.

Gawas nga andamon ang mga sudlanan sa bakuna ug mga ice packs alang niini, kinahanglan usab nga tarongon ug sundon ang gilataid nga paagi sa paghan-ay sa ice-packs subay sa girekomenda nga paagi sa instruksyon sa tighimo sa bakuna.

Gani, dili mahimo nga sama sa ice cream, puston pa og papel ang ice packs.

Mag-andam usab sila sa re-sealable plastic bags alang sa mga bakuna nga nagamit na ug wala mahurot og tupok ug sa mga bakuna nga wala maablihi sa adlaw sa pagpangbakuna, bisan pa nga banabanaon na nga daan kon pila ka bakuna ang magamit sa adlaw sa pagpangbakuna aron dili magawas sa cold chain ang dili pa kinahanglang gamiton sa adlaw.

Sa pagkahuman sa usa  ka adlaw nga pagpangbakuna, isulod sa resealable plastic containers sa tinag kawhaan ang wala magamit nga bakuna ug adto kini isuksok sa tunga sa vaccine carrier aron pugngan ang kadaut dala sa condensation.

Gawas usab nga ilista ang mga bakuna nga nakuha matag adlaw ug pirmahan sa mga superbisor, ilista usab ang mga nahibalik nga bakuna nga napagawas sa cold chain.

Sa pagkahuman sa usa  ka adlaw sa pagpangbakuna, ang tanang vials, nabuksan man o wala, isulod sa resealable plastic ug iuli gayud sa gigikanan nga health facility aron malista sa superbisor.

Sa pag-abut sa bakuna sa health facility, isulod kini dayun sa cold chain aron magamit sa sunod nga mga adlaw.

Ang bakuna nga wala makompleto og gamit, o nakuhaan na og gamay, dili na mahimong gamiton pa ug masayang na. 

Kini isulod pa sa sako ug kolektahon sa Center for Health and Development sa DOH matag human sa pagpangbakuna aron ipahiluna og labay sa saktong paagi.

Subay niini, gawas sa Sinovac nga ang usa  ka vial igi lamang sa usa ka tupokan, ang bakuna sa AstraZeneca, makahimo og napulo ngadto sa 12 ka tupokan sa usa ka vial.

"Tungod usab niini, kon sa inyong panahon sa pagpangbakuna, AstraZeneca ang gigamit, mas maayo gayud nga makompleto ang napulo ngadto sa 12 ka tawo nga tupokan, aron walay bakuna nga masayang," sugyot sa DOH. (rahc/PIA7/Bohol)

Source: Philippines Information Agency (pia.gov.ph)