TAGBILARAN CITY, May 6 (PIA) -- Nagpatuman og travel restrictions ang Pilipinas sa mga pasahero nga gikan sa Pakistan, Bangladesh, Nepal ug Sri Lanka aron mapugngan nga makasulod sa nasod ang variant sa COVID-19 nga gikan sa India.
Base sa memorandum nga gipagawas ni Executive Secretary Salvador Medialdea, dili una tugotang makasulod ang mga pasahero nga may travel history sa mga nahisgotang nasod sa milabay nga 14 ka adlaw.
Epektibo ang travel restrictions gikan ala-1:00 sa kadlawon sa Mayo 7, hangtod sa Mayo 14, 2021.
Ang tanang mga pasahero nga naggikan sa Pakistan, Nepal, Sri Lanka ug Bangladesh sa milabay nga 14 ka adlaw nga moabot sa nasod sa dili pa mag ala-una sa kadlawon sa Mayo 7, oras sa Manila, tugotang makasulod apan kinahanglang mopaubos sa 14 ka adlaw nga facility-based quarantine bisan pa nagnegatibo sa RT-PCR test.
Samtang ang mga Pilipino ug foreign nationals nga niagi lamang ang ilang flights gikan sa mga nahisgotang mga nasod o nagpabilin lamang sa airport ug wala nisulod sa mga nahisgotang nasod, wala gikonsiderang naggikan o adunay travel history sa maong mga nasod.
Tungod niini, wala na gi-require ang 14 day facility based quarantine, apan angay nga mosunod pa gihapon sila sa quarantine ug testing protocol nga gipatuman sa mga tugpahanan.
Ang tanang COVID-19 positive specimen nga makuha gikan sa mga pasahero gikan sa nahisgotang mga nasod, apil na ang nasod sa India, kinahanglang mopaubos sa Whole Genome Sequencing.
Samtang ang close contact tracing kinahanglang sundon. (ecb/PIA7-Bohol)
Source: Philippines Information Agency (pia.gov.ph)
0 Comments