TAGBILARAN CITY, Bohol, May 3 (PIA) -- Moabut ra gyud ang panahon nga kadtong walay ikapakita nga Bohol COVID-19 Contact Tracing Card (Bohol CCTC) dili na makagawas sa balay.
Kini human imandu sa gobernador pinaagi sa usa ka Executive Order nga gawas sa estrikto nga pagpatuman sa health ug safety standards ug protocols batok sa coronavirus disease (COVID-19), himoon usab sa Bohol ang epektibo ug episyente nga sistema sa contact tracing, aron kontrolahon ang kalit nga pagsulbog sa kaso dinhi sa Bohol.
Giluwatan ni Gob Arthur Yap ang Executive Order No 25, series of 2021, usa ka mandu sa pagmugna sa Bohol Tracking and Data Control Center (TDCC) ug ang paglusad sa Bohol COVID-19 Contact Tracing System (Bohol CCTS).
Sa iyang mandu nga gipagawas niadtong Abril 23, gidasonan sa gobernador ang panginahanglan sa paggamit sa mga bag-ong teknolohiya sa contact tracing, hinungdan nga kinahanglan lamang matukod ang TDCC ug ikalusad ang CCTS.
Hinuon, walay gipadayag ang Kapitolyo kon ang Bohol CCTS, lahi ba usab sa una nga Bohol Cards nga giingon nga libre, nga hangtud karon, wala magamit sa sakto kay wala mahiusa sa mga contact tracing systems sa nasud.
Niini, gideklara sa gobernador nga samtang nagpadayon ang hulga sa COVID 19, o hangtud nga mapapas na kining Executive Order, ipatuman na ang No Bohol CCTS, No Entry sa tibuok lalawigan sa Bohol.
Tungod usab niini, gimugna ang CCTS nga usa ka sistema sa contact tracing nga ipatuman sa tanan nga mga business establishment, buhatan sa kagamhanan, tanang residente sa Bohol, mga mopauli nga residente, APOR ug kadtong mga mosulod nga turista nga mopailawom sa tourism bubble.
Hinuon, dili ipatuman sa 14 anyos paubos, ang CCTS kinahanglang huptan sa mga 15 anyos pataas ug pangayoon sa pagsulod sa mga merkado publiko, terminal nga pangpubliko, pamasaheroan, establisemento ug institusyon sama sa panimbahan, eskwelahan, bangko ug finance.
Usa ka website ang gimontar na karon diin ang tanan nga nasudnon ug local nga buhatan sa kagamhanan, lakip na ang mga buhatan nga iya sa kagamhanan (GOCC), ug mga negosyo niini samtang nia sa Bohol sama sa eskwelahan, merkado, terminal, ospital, sports complex ug gymnasiums, mga pribadong negosyo, religious ug educational institutions ug tanang pangpublikong terminal sa panakyanan, mga PUVs nga nagpamasaheroan dinhi sa Bohol kinahanglang morehistro.
Gilatid usab sa Executive Order ang giya sa pagkuha sa datus ug kasayuran, diin ang kagamhanang probinsyal tinabangan sa mga munisipyo maoy magkuha sa datus gamit ang Basic Personal Form alang sa Bohol TDCC.
Ang kasayuran nga kuhaon maglangkob sa kompleto nga ngalan, adlaw nga natawhan, address, contact number.
Segun pa sa EO, ang sistema sa tracking magbase sa mga residente, dili residente, ug negosyo.
Kadtong mosulod sa Bohol nga may personal ug temporaryong tuyo, parehistrohon online sa Bohol TDCC aron mamakuha sa QR Coded nga Bohol TDCC card aron maoy ikapakita sa iyang pagsulod sa mga lugar sa Bohol ug mga establisemento niini.
Ang kadtong mga mamauli sa Bohol, APOR morehistro usab sa susamang katuyuan.
Ang mga pribado nga business establishments moparehistro usab sa ilang Private Data Establishment Form sa TDCC lakip na ang ngalan sa establismento, kompeto nga address, Contact person, Contact Number ug klase sa negosyo.
Segun sa mandu, ang Syudad ug Munisipyo motabang sa ilang mga residente ug establisemento sa pagrehistro sa TDCC aron makakuha sa Bohol CCTS Card.
PInaagi niini, kadtong walay CCTS Card, dili na makasulod sa tanang establisemento, kay obligado man ang establisemento nga magbutang og Bohol TDCC terminals nga magkuha sa scanning ug information gathering sa tanang kliyente ug bisita nga mosulod didto, base sa QR Coded Cards. (rahc/PIA-7/Bohol)
Source: Philippines Information Agency (pia.gov.ph)
0 Comments