TAGBILARAN CITY, June 4 (PIA)--Nipasidaan ang Land Transportation Office (LTO) sa publiko nga dili makig-transaksyon sa pekeng Facebook page nga nagpaila isip tinuod ug lehitimong LTO account.
Ang Facebook account nga @OfficialLTOlicenseassistance o LTO License Assistance Center, giingong nagtanyag og pagproseso sa mga driver’s licenses ug naningil sa mga aplikante og P3,500 hangtod P6,500.
Ang maong mga scammer nang-awhag sa paggamit og fixers aron dili na mokuha og exam o pasulit ug moadto pa sa buhatan sa LTO ang usa ka aplikante.
Matud pa sa gipagawas nga pahayag sa LTO, likayan ang paghatag og mga pribadong impormasyon online ilabi na sa mga unauthorized ug unverified pages aron dili mabiktima sa identity theft ug uban pang paglapas sa balaod.
Gipa-amping ang publiko nga dili modawat sa mga tanyag nga serbisyo sa pekeng LTO License Assistance Center o bisan kinsang indibidwal sa gawas sa mga LTO Office ug dili ilhon ang lisensya nga gi-isyu sa maong bogus nga page. Nipasidaan ang buhatan nga mas dakung silot ang ipahamtang sa mga indibidwal nga masakpang naggunit og pekeng lisensya.
Nanawagan usab ang LTO sa publiko na i-report ang Facebook page nga https://ift.tt/3fUQJrd aron mahunong na ang pagpangilad ug mga ilegal nga binuhatan. (ecb/PIA7-Bohol)
Source: Philippines Information Agency (pia.gov.ph)
0 Comments