CORTES, Bohol, June 3 (PIA) – Pormal nga itunol sa National Housing Authority (NHA) ngadto sa mga kanhi rebelde apan mipili na nga manginabuhing malinawon ang tabang alang sa pabalay ug ayuda pagpa-ayo sa balay, sa usa ka seremonyas nga tambongan sa mga opisyales sa Bohol, ug kasundalohan sulod sa Camp Rajah Sikatuna sa Katipunan Carmen, Hunyo 3.
Napulo ug unom ka mga benepisaryo sa programa sa kagamhanan nga gipaagi sa NHA ang modawat sa tag P100 ka libo ka pesos alang sa pagpaayo sa ilang mga balay karon nga ilang gipuy-an samtang walo ka benepisaryo usab ang tukoran og balay pinaagi sa pundo nga gihatag sa NHA, segun sa taho sa ahensya.
Sa 16 ka benepisaryo sa tag P100 mil, lima niini gikan sa Antequera, tulo sa Calape, usa sa Catigbian, duha sa Guindulman, tulo gikan sa Sevilla ug duha gikan sa Loon.
Sa walo ka benepisaryo nga may pundo alang sa bag-ong balay: tulo niini gikan sa Antequera, usa sa Guindulman, tulo gikan sa Sevilla ug usa gikan sa Mabini.
Kinatibuk-ang P5.2 milyones ang pundo sa kagamhanan alang lamang niining programaha ang itugyan sa NHA didto sa seremonyas.
Kahinumduman nga may duha ka matang sa programa ang gitagana sa nasudnong kagamhanan alang kanila nga gikan sa mga pundok nga nagkatag og kasamok pinaagi sa armadong pakigbisug apan karon nakig-abin na sa kagamhanan.
Ang una: ang Comprehensive and Local Integration Program (CLIP) nga gidumala sa Department of Interior and Local Government alang sa pagtabang sa pagkab-ot sa tumong sa hingpit nga pag-paundang sa armadong pakigbisug ug ang Payapa at Masaganang Pamayannan (Pamana) Program nga nagtumong sa hiniusang kaugmaran sa mga komunidad nga na-angin sa kagubot, programa nga gidumala sa Office of the Presidential Adviser on the Peace Process (OPAPP).
Apan pinaagi sa Administrative Order No. 10 “Centralizing All Government Efforts For The Reintegration Of Former Rebels And Creating For The Purpose An Inter-Agency Task Force”, gihiusa ang duha ka programa ngadto sa Enhanced Comprehensive Local Integration Program (E-CLIP).
Ang ECLIP na karon ang nagtanyag og kompleto nga bugkos sa tabang ngadto sa mga kanhi rebelde nga sakop sa Communist Party of the Philippines (CPP), New People’s Army (NPA) ug sa National Democratic Front (NDF).
Gani, dili lamang kini mismo magamit sa mga kanhi rebelde apan usab sa ilang mga kabanay nga migawas sa kalihukan sugod sa pagpagawas sa AO No. 10, ug mipadayag sa ilang kasibut sa pagbiya sa armadong kalihukan aron manginabuhing malinawon, segun sa NHA.
Sa mga kanhi rebelde nga migawas sugod sa Hulyo 2016 gitanyagan na usab sa mga benepisyo sa ECLIP gawas sa ilang unang nadawat nga CLIP package.
Subay sa nahisgutang AO, gimugna ang Task Force Balik Loob (TFBL) aron maoy magdumala sa mga paningkamot nga tabangan nga mapahiuli ang kalinaw.
Ang NHA sanglit sakop sa TFBL, gisangonan sa paghatag og abag pabalay o kompleto nga balay ngadto sa mga mingtahan nga mga rebelde, subay usab sa Implementing Rules and Regulations.
Pinaagi usab sa NHA Memorandum Circular Nos. 2019-041 may tulo ka pilianan sa hinabang sa mga kanhi rebelde, gikan sa NHA: ang pagkuha sa mag pabalay nga gitagana sa mga kapolisan ug kasundalohan ug gitagana na usab sa mga kanhi rebelde, tabang pinansyal nga P450,000.00 alang s apagtukod og bag-ong balay sa lugar nga gipili sa kanhi relebde, ug tabang pinansyal nga P100 mil labing daku alang sa pagpaayo ug pagpahiuli sa balay nga iya na sa kanhi rebelde. (rahc/PIA-7/Bohol)
Source: Philippines Information Agency (pia.gov.ph)
0 Comments