Cebuano News: TESDA, nanawagan sa LGUs nga hatagan og trabaho ang contact tracing graduates

Base sa datos sa TESDA, may 3,621 ka scholars sa tibuok nasod ang nakahuman sa Contact Tracing Training Program apan 594 lamang ang na-hire sa mga LGUs. Samtang naa sa 540 usab ang gidawat sa nagkalain-laing sektor. (TESDA)

TAGBILARAN CITY, June 2 (PIA) -- Nanawagan ang Technical Education and Skills Development Authority (TESDA) sa local government units nga hatagan og trabaho  ang mga contact tracing graduates aron motabang sa pagpugong sa pagkatap sa COVID-19.

Sa usa  ka pahayag, miingon si TESDA Director-General Isidro Lapeña nga i-konsiderar unta sa mga mayor ang contact tracers nga nabansay ubos sa programa sa ahensya ilabi na nga taas pa gihapon ang kaso sa COVID-19.

Base sa datos sa TESDA, may 3,621 ka scholars sa tibuok nasod ang nakahuman sa Contact Tracing Training Program apan 594 lamang ang na-hire sa mga LGUs.

Samtang naa sa 540 usab ang gidawat sa nagkalain-laing sektor.

Nanawagan usab si Lapeña sa tanang TESDA Training Institutions nga ipa-rehistro ang CTTP, Barangay Health Services, ug uban pang healthcare-related programs.

Ang pagbansay kalabot sa contact tracing namugna sa tabang sa Department of Health (DOH) ug mga batid sa panglawas nga gipahigayon sulod sa 15 ka adlaw pinaagi sa blended learning modality. (ecb/PIA7-Bohol)

 

Source: Philippines Information Agency (pia.gov.ph)