Hiligaynon News: GSIS ginaproseso na ang bulig pinansyal para sa EC pensioners

SYUDAD SANG ILOILO, Hunyo 6 (PIA) - - Ginsuguran na sang Government Service Insurance System (GSIS) ang pagproseso sang isa ka bes nga bulig pinansyal para sa tanan nga pensionado sang Employees Compensation sa idalum sang Administrative Order No. 39 nga ginlagdaan ni Presidente Rodrigo Duterte sadtong Abril 19 sini nga tuig.

Suno kay Mike Arancillo, Information Officer sang GSIS-Iloilo, sa hinun-anon sa PIA Kapihan radio program nga ginpalayag sa Radyo Pilipinas sang Biyernes nga adlaw, ginaproseso na sang ila claims unit ang bulig pinansyal agud ini ang mahatag sa mga  EC pensioners diri sa Iloilo.

Ginapahanugutan sang AO 39 ang paghatag sang P20,000 nga one-time financial assistance sa tanan nga EC pensioners, nagikan sa pampubliko kag pribado nga sektor, agud mapahagan hagan ang mga pinansyal nga kabudlay nga ila naeksperyensyahan sa tion sang pandemya sa coronavirus disease 2019.

Ginpahayag man ni Arancillo nga masobra sa 200 ka EC pensioner sa pampubliko nga sektor sa Iloilo ang mahimo makabaton sang bulig pinansyal. Ginalakipan ining mga pensionado sang yadtong mga anay empleyado sang gobyerno nga nagretiro sa idalum sang Presidential Decree No. 626 bangud sa balatian, kasamaran kag kasablagan may kaangtanan sa trabaho.

Gindugang sini nga ang mga asawa sang mga EC pensioner nga napatay ukon  EC survivorship pensioners ang makabaton man sang bulig pinansyal nagikan sa pondo sang EC nga gina-administrar sang GSIS.

Ang mga EC pensioner ang  pahibaluon sa tion nga ang ila tseke ang handa na nga iga-release. Para sa iskedyul sang pagkuha sang ila tseke mahimo sila mag- email sa gsisiloilo@gsis.gov.ph.

Samtang ginpangayo naman ni Arancillo ang paghangop sang mga miyembro bangud ang GSIS Iloilo Branch ang temporary nga ginpasirado tubtub Hunyo 6, 2021 para sa disinfection sang lugar kag pagpatigayon sang mass testing sang empleyado kag contact tracing. Ini matapos nga 23 ka mga empleyado ang positibo sa COVID 19 tubtub sang Mayo 30.

Ginpasigurado naman sini ang mga kliyente nga ang operasyon sang GSIS Iloilo branch ang padayon bangud ang mga empleyado nga naga-obra sa ila mga puluy-an padayon nga nagaproseso sang mga claim kag request.

Ginarefer naman sini sa GSIS Iloilo Branch Official Facebook page ang mga kliyente para sa pinakaulihi nga announcements kag updates. (JSC/laf/PIA6 Iloilo)

 

Source: Philippines Information Agency (pia.gov.ph)