SYUDAD SANG ILOILO, Mayo 1 (PIA) - - Kabilugan nga 800 ka mga panimalay ang napilian nga magasabat sa nahauna nga quarter round sang 2020 Labor Force and Consumer and Business Rapid Assessment Survey nga nagsugod sang Abril 20.
Ginpahayag ni Philippine Statistics Authority - Iloilo Chief Statistical Specialist Nelida Amolar nga 414 sang sining ginkilala nga mga sample household ang halin sa syudad sang Iloilo kag 386 nagikan sa probinsya sang Iloilo.
Suno kay Amolar, ang hubon sang PSA personnel kag statistical researchers magabisita sa sini nga mga panimalay para sa face to face interview gamit ang Computer Aided Personal Interview (CAPI) nga nagasunod sa physical distancing.
Ang mga sample nga panimalay may yara man nga pilian nga alternatibo nga pamaagi sa pagsabat sang survey. Sila mahimo magsabat pinaagi sa Tel-In ukon telephone interview, sa diin mahimo nila ihatag ang ila numero sa telepono; Online Questionnaire nga accessible electronically nga may code/link nga igahatag nagikan PSA; kag E-Questionnaire accessible pinaagi sa email nga may password nga igahatag ang PSA.
Ginpahayag ni Amolar nga ang mga protokol kag pagsulundan nga ginpaguwa sang Inter-Agency Task Force on the Management of Emerging Infectious Diseases (IATF-EID) ang hugot nga sundon sa tion nga ginapatigayon ang survey.
Suno pa sa iya nga ang mga hubon sang PSA nga igapadala ang hugot man nga i-obserbar ang protokol sa ikaayong lawas kasubong sang pagsuksok sang face mask, social distancing kag proper hygiene, samtang magasuksok man sang PSA ID ang magapatigayon sang survey.
Pinaagi sa Resolusyon Numero 22 sadtong Abril 8, 2020, ginpahanugutan sang IATF-EID ang PSA nga magpatigayon sang pagtipon sang datos kag mga survey activities natuhoy sa impact sang COVID-19. (laf/PIA6-Iloilo)
Source: Philippines Information Agency (pia.gov.ph)
0 Comments