SIQUIJOR, May 21 (PIA) — Dili momenos sa P9 ka milyon ang nahatag sa buhatan sa Department of Labor and Employment (DOLE) isip ayuda alang sa mga mamumuo sa lalawigan nga apektado sa COVID-19 nga epidemya sugod niadtong Marso.
Kini gibutyag ni Nole Torres, Officer-in-charge sa DOLE atul sa Straight from the Source Interview nga gipasiugdahan sa Philippine Information Agency-Siquijor kauban sa Department of Information and Communication Technology (DICT) ning lalawigan.
Sumala pa ni Torres, ang DOLE nakahatag ug P8,735,000 ubos sa ilang Covid-19 Adjustment Measure Program o CAMP ngadto sa 1,747 ka mamumuo sa 144 ka aprubadong establisamento gikan sa 306 ka aplikanteng establisamento.
Ang CAMP ang usa ka program alang sa formal sector nga naglangkob sa mga mamumuo nga nagsweldo matag petsa 15 o 30 sa bulan o ikaduha makasweldo sa usa ka bulan ug adunay employee-employer relationship.
Kini naghatag ug cash assistance sa mga apektadong mamumuo sa formal nga sector kinsa naapektuhan ang ilang panginabuhi tungod sa kausaban sa ilang oras sa pagpanarbaho o flexible work nga giimplemintar o temporary closure sa ilang gitrabahoan nga tindahan o kompanya.
Ang matag mamumuo makadawat ug P5,000.00.
Nakahatag usab ang DOLE ug P505,000 ngadto sa 125 ka mamumuo ubos sa Tulong Panghanapbuhay sa ating Displaced/Disadvantaged Workers - Bahay Ko, Barangay Ko Disinfection and Sanitation Program (TUPAD BKBK).
Ang maong kantidad naglangkob sa 10 ka adlaw nga pagtrabaho sa tag P404 kada adlaw kon P4,040 matag mamumuo.
Ang TUPAD BKBK usa sa ilang programa nga gipahigayon paghatag ug temporaryong trabaho sa informal sector nga naglangkob sa mga mamaligyaay (ambulant vendor), driver, mag-uuma mangingisda ug uban pa.
Kini naghatag ug trabaho sulod sa napulo ka adlaw diin ang mamumuo makadawat sa suhol nga P404 matag adlaw. Sila magtrabaho sama pananglit sa pag-disinfect sa komunidad o sa ilang kaugalingong panimalay sulod sa upat ka oras matag adlaw.
Matud ni Torres, adunay 125 ka beneficiaries sa unang hut-ong sa TUPAD sa nagkalain-laing barangay sa probinsya sa Siquijor ug sila nakadawat na sa ilang suhol. Samtang ang suhol sa lain pang 594 ka mamumuo alang sa ikaduhang hugna nga, kamulo pang giproseso, sumala pa niya.
Atol sa maong interview miawhag si Torres sa mga pribadong establishments nga mo sumiter sa ilang report kauban ang lista sa mga mamumuo nga apektado sa flexible work o temporary closure uban ang payroll ug mga detalye apil na ang contact number arun masuta nga lihitimo ang mamumuo sa kompanya.
Ang maong mga dokumento mahimong masumiter pinaagi sa online-application o sa ilang buhatan mismo ning lalawigan. Ang mga porma mahimong e-download sa site sa sa Department of Labor and Employment, sumala pa niya.
Sa kasamtangan, sumala pa ni Torres, gipahunong una ang pagdawat sa mga application tungod kay kulang ang budget sa DOLE.
Gipaabot pa ang sunod nga budget release, matud pa niya.
Ang DOLE-Siquijor mi coordinate sa mga lokal nga kagamhanan ilabina sa barangay arun masuta kinsa ang angayan nga mahatagan ug ayuda maong programa.
Ang CAMP ug TUPAD ambag sa DOLE isip usa ka miyembro sa mga ahensya nga kauban sa Bayanihan, WE Heal as One Act, dugang pa ni Torres. (rac/PIA7-Siquijor)
Source: Philippines Information Agency (pia.gov.ph)
0 Comments