Cebuano News: Huwam sa PAG-IBIG Fund nga bayran unta sa ECQ, may palugway

AUTOMATIC ANG PALUGWAY. Dili na kinahanglan pang applayan pa kay automatic ang palugway nga 30 ka adlaw tungod sa kahasul dala sa COVID crisis, lahi sa moratorium sa pagbayad sa mga loans nga kinahanglang nga applayan aron lugwayan usab, matud ni PAG-IBIG FUND Bohol sales and marketing division head Leonardo Cirujales didto sa Kapihan sa PIA. (PIA Bohol) 

CORTES, Bohol, May 22 (PIA) – Gimandu na sa Home Development Mutual Funds sa Pagtutulongan, Ikaw, Bangfko, Industriya at Gobyerno (PAG-IBIG FUND) ang duha  ka mga programa agi og pagtubag sa panawagan sa Republic Act 11469 o ang Bayanihan To Heal as One Act.

Matud sa PAG-IBIG Fund, opisyal na nila nga gibuksan ang 30 ka adlaw nga palugway (grace period) sa tanan nga loans sa mga sakop nga apektado sa Enhanced Community Quarantine (ECQ).

Dugang pa sa PAG-IBIG Fund, ila na usab nga opisyal nga gitanyag ang moratorium sa tanan nga amortisasyon sa short term loans, ug amortisasyon sa housing, ug installment nga bayranan sa tanan nga nanghuwam sa PAG-IBIG FUND ug mga mingpalit sa mga housing units nga ilang gipundohan nga karon apektado sa pagdumala sa Corona Virus disease (COVID-19).

Sa paghatag sa 30 ka adlaw nga palugway sa tanan nga pahuwam sa mga apektado sa ECQ, mipahayag ang PAG-IBIG Fund nga agi og pagtamod sa Republic Act No. 11469, o ang “Bayanihan to Heal as One” Act, ug subay sa Implementing Rules and Regulations niini, nakahukom ang PAG-IBIG fund nga ipailawom sa programa ang tanan nga pahuwam nga may principal ug o interes nga ang pagbayad nahulog sa panahon nga naa nga ECQ gikan niadtong Marso 17, 2020 ngadto sa Abril 12, 2020.

Gitataw usab sa PAG-IBIG fund nga kini nahasubay usab sa Proclamation No. 929 pinitsahan niadtong Marso 16, 2020.

Gipasabut usab sa PAG-IBIG Funds nga ang makabenepisyo niini, kadtong nakahuwam sa PAG-IBIG Funds, mahimong indibidwal o mahimo usab nga mga entities nga may legal nga personalidad.

Subay usab niini, kadtong nakahuwam sa sobra pa sa us aka pahuwam sa PAG-IBIG FUND, ang matag loan niini, may katumbas nga palugway , subay usab sa terms and conditions nga gipahaum niini nga mga guidelines.

Sa mga kondisyones, ang tanan nga loans nga may principal amount o interest nga ang pagbayad natunong sa ECQ, mahimong mo-avail sa 30 ka adlaw nga palugway kanus-a ang iyang bayronon magpabilin nga walay interes, multa o silot  ug uban pang gipatong nga balayranan.

Gani, pasumpay sa PAG-IBIG FUND, mahimo usab nga inaton pa ang palugway sa higayon nga initon usab sa Presidente sa Pilipinas subay sa iyang emergency powers ubos sa Bayanihan to Heal as One Act.

Mahimo na kabayran ang amortisasyon sa gipalugwayan nga huwam sa unang adlaw nga trabaho-an human sa palugway, ug gani maho usab nga ang interes, anha na bayad sa nahibilin nga buwanang bayranan sa huwam.

Gitataw usab sa PAG-IBIG Fund nga kini nga palugway mahimong dili moapply kon ang nanghuwam, makabayad ra gihapon bisan sa panahon nga naa sa ECQ, segun sa PAG-IBIG Fund. (rahc/PIA-7/Bohol)

Source: Philippines Information Agency (pia.gov.ph)