Cebuano News: Libo-an'g empleyado sa 170 establisemento sa Bohol benepisaryo sa CAMP

TAGBILARAN CITY, Bohol, May 14 (PIA) -- Libo-an ka mga empleyado sa kinatibuk-an nga 170 ka mga establisemento sa Bohol ang nakadawat sa one-ime nga cash nga hinabang sa kagamhanan subay sa COVID Adjustment Measures Program (CAMP), segun sa kasayuran gikan sa Department of Labor and Employment (DOLE).

Kini bisan pa nga gisuspenso na sa DOLE ang pagpanawat sa aplikasyon sa pagpangayo og hinabang ubos sa CAMP sa mga mamumuo sa formal sector sugod Abril 15.

Gisuspenso sa labor department ang hinabang sa CAMP tungod sa kadaghan sa application nga ilang nadawat nga nagkuwang na ang pundo nga gipahat alang sa programa.

Ang CAMP aduna lamay P1.6 bilyones nga pundo nga pahat apan sugod sa pagpanawat sa ahensya sa mga application, nakahatag na sila sa sa tag P 5 mil nga one-time assistance ngadto sa 236,412 ka trabahante gikan sa 10,663 ka establisemento, segun sa DOLE.

Niadtong Abril 14, gitaho sa DOLE nga napanghatag na nila ang P1.2 bilyones samtang may kapin pa sa 85 mil nga mga trabahante gikan sa mga aprobado nga establisemento sa CAMP nga hataganan pa.

Sa 170 ka mga establisemento sa Bohol, duolan sa 100 ka establisemento nga nagpatabang sa CAMP, naa sa industriya sa turismo, samtang ang uban naa sa mga industriya sa pangkan-anan, mga buhatan ug mga naa sa industriya sa information communication and technology.

Sa mga establisemento nga wala na makaapil sa CAMP, giduso usab sa DOLE ngadto sa programa sa Department of Finance, Bureau of Internal Revenue ug sa Social Security System.

Ang Small Business Wage Subsidy (SBWS) maoy gipanghatag sa DOLE ngadto sa mga wala na makadawat pa sa CAMP.

Ang  SBWS hinabang alang sa mga middle class nga nawad-an og sweldo ug panginabuhi-an dala sa COVID.

Dinhi, may ayuda nga gikan sa P5,000 ngadto sa P8,000 depende sa rehiyon.

Hinuon, ang SBWS nahuman na niadtong Mayo 8 pa lamang.

Bisan pa man, nangayo og pagsabut ang DOLE sa mga wala na makaapas sa ayuda sanglit matud pa sa DOLE, mingkalit og kadaghan ang nag-apply nga sobra na sa kapasidad sa  pundo nga ikahatag.

Nakita usab sa DOLE nga ang pag-lugway sa Enhanced Community Quarantine nakaapekto usab sa ilang pundo sanglit mingdaghan og kalit  ang nanginahanglan.

Matud sa DOLE, kasamtangan silang nakigtali sa ubang mga ahensya, lakip na ang Kongreso, alang sa hinanali nga programa nga ikapanghulip sa programa nga makahatag alibyo sa mga katawhang naglisud ug wala na maapil sa DOLE CAMP. (rahc/PIA-7/Bohol)

Source: Philippines Information Agency (pia.gov.ph)