TANGUB CITY, Misamis Occidental, May0 15 (PIA)--Gihatagan ug allowance sa kagamhanang probinsyal sa Misamis Occidental ang mga frontliners nga anaa sa mga checkpoint.
Gipahayag ni Misamis Occidental Governor Philip Tan nga usa kini ka pamaagi sa pagpasalamat ug pag-ila sa dakung tampo sa mga frontliners arun magpadayon nga mailikay ang katawhan sa COVID-19.
Gipasabot usab ni Provincial Administrator Edemar Alota nga naggahin ug pondo ang probinsya pinasubay sa giaprobahan nga resolution sa Sanggunian Panlalawigan sa pagpanguna ni Vice Governor Gegee Almonte arun hatagan ug allowance ang mga frontliners.
Midawat ang mga pulis, bombero, medical health workers nga gikan sa mga Rural Health Unit sa matag LGU ug tag P4,200.00 gikan sa tag 150 pesos nga meal allowance sulod sa 28 ka adlaw.
Kagahapon gisugdan ang pagpanghatag sa maong allowance sa dakbayan sa Tangub ug gisunod usab dayun ang ubang mga LGUs.
Mapasalamaton usab kaayo si Tangub City Mayor Jennifer Wee Tan sa provincial government sa paghatag ug supporta sa mga frontliners dungan sa pag awhag niini nga kanunay nga mag-amping sailang kaugalingon.
Una nang nahatagan sa maong allowance ang mga BHERTs sa mga kabarangayan sa Misamis Occidental. (BETHSER DABLO/PIA 10)
Source: Philippines Information Agency (pia.gov.ph)
0 Comments