KALIBO, Aklan, Hulyo 1 (PIA) -- Dapat nga magsunod sa “health protocols” ro mga fastfood ag restaurant iya sa probinsya it Aklan, suno sa Department of Trade and Industry (DTI).
Raya nga pagpasunod hay suno sa Memorandum Circular 20-37 nga ginpaguwa it rayang ahensya.
Base sa rayang memorandum, ro mga restaurant ag fastfood sa mga lugar nga ginpa-idaeum sa Modified General Community Quarantine (MGCQ) hay ginasugtan nga magpakaon it mga customer sa sueod pero dapat hay may ipatuman nga mga limitasyon.
Ro mga limitasyon ngara ag “health protocols,” suno kay DTI-Aklan Provincial Director Ma. Carmen Iturralde, hay rong pag obserbar it sang metro nga distansya sa mga customer, pagbutang it “foot baths,” ag pagbutang man sa sueod it istablisimyento it alcohol ag “hand sanitizers” nga magamit it mga customer.
Daea sa memorandum circular ro tanan nga mga kaean-an pati ro mga karinderya.
Owa man it DTI ginasugtan ro pag-aeatubang it mga customer kon ro mga erstablisimyento hay owa it ginbutang nga partisyon.
Rayang mga tikang hay agud nga ro mga tag-ana it establisemyento ag mga customer hay maenad eon sa ginatawag nga “new normal” samtang nga ro nasyon hay padayon nga nagapakig-away sa COVID-19.
Ginhambae ni Iturralde nga sarang irekomenda it DTI ro pagpasarado it sangka establisimyento kon indi ro mga raya magsunod sa mga regulasyon. (JSC/VGV/PIA6 Aklan)
Source: Philippines Information Agency (pia.gov.ph)
0 Comments