TAGBILARAN CITY, Bohol, June 4 (PIA) -- Gisaad sa Department of Public Works and Highways District Engineering Office I nga dili ra abtan og 20 ka adlaw ang kahasul nga ikahatag sa gipatuman nga reroute dala sa giayo nga karsada sa Baclayon.
Sa iyang suwat pahibalo ngadto sa mga motorista ug mga manakayay, matud ni District Engineer Francis Antonio Flores nga subay sa ilang Infrastructure Dissemination Program, may pundo nga alang sa Tagbilaran East Road ang napagawas alang sa pagpahiuli, pagpamaayo pa ug sa pag-ayo sa mga nangaguba nga bahin sa sementado nga karsada sa Baclayon gikan sa tungod sa merkado paingon na sa Barangay Montana.
Aron ikapatuman ang maong pundo alang sa proyekto, himoon nga one-way ang dagan sa mga sakyanan gikan sa merkado sa Baclayon paingon sa Alburquerque hangtod sa bag-ong Tagbilaran City access to bypass Road sa Montana.
Dason ni Engr. Flores nga ang pagpahimo niining one-way alang sa mas luwas nga pagbyahe sa publiko ug mas mapadali pa gayud ang pagtrabaho kay ang pikas nga lane, kapundohan na man sa mga bug-at nga ekipo sama sa excavator ug dumptrucks.
Tungod sa one-way scheme, ang tanang sakyanan nga mopaingon sa Albur lahus na sa Jagna, mahimong mosubay sa one-way sa highway sa Baclayon, apan mahimo usab nga adto sa taas moagi kay bukas usab ang Tagbilaran City Bypass Road sa ibabaw alang sa two-way traffic.
Hinuon, kadtong gikan sa Alburquerque og mopasulod sa Tagbilaran, obligado sila nga moagi sa Bypass Road agi sa Sementeryo sa Baclayon, o moliko sa Landican aron makasulod sa likod sa merkado sa Baclayon.
Alang sa temporary nga kahasul, nangayo og dispensa ang District engineer, apan ilang gibutyag nga kini temporary lamang ug alang sa 20 ka adlaw lamang sugod sa Hunyo 2. (rahc/PIA-7/Bohol)
Source: Philippines Information Agency (pia.gov.ph)
0 Comments