Cebuano News: Bag-ong Resort, Modala sa Bohol sa pagbangon

ANG LOBBY SA MODALA. Giplano sa usa ka Amerkano nga architect nga nagbase sa Hawaii, ang Modala, migamit sa organic architecture diin daghan og kalagbasan ang hangin aron momenos ang panginahanglan sa airconditioning, matud pa sa tagdumala. (rahc/PIA-7/Bohol) 

TAGBILARAN CITY, Bohol, Aug. 6 (PIA) –- Agi og paghatag og buhi ng sumbanan sa pagbangon sa negosyo sa turismo sa Bohol ug sa Panglao, maghimo sa soft opening ang usa ka daku ug bag-o nga resort sa isla nga nagpabansiwag sa turismo sa Septembre 16 pohon.

Dinhi nga panahona, nagtuo si Modala Beach Resort Hotel manager ug inila nga hotelier Rommel Gonzales nga makabukas na sila sa 50 sa 126 ka hamugaway kwarto nga gidesenyo sa Amrkanong architect nga tighimo og mga hotel sa Hawaii. 

Ang Modala beach resort hotel nga nahimutang sa labing taas nga sangkad sa puting baybayon sa Bohol sa Doljo Panglao, mipili gayud nga dili una modawat sa mga namauli nga Overseas Filipino Workers ug Locally Stranded Individuals sa ilang 14 ka adlaw nga paglaming, tungod sa posible nga stigma nga mabati sa ilang mga customer pohon kon masayud nga may mipuyo dinhi nga may pagduda sa mananakod nga kagaw.

Gani, matud ni Gonzales, kinsa kanhi manager sa silingan nga Bellevue Hotel, nga tungod sa pagpili nila na dili una modawat sa tanyag isip himoong nga hotel nga pangkwarantina, nahimo nga didto mipuyo ang kalihim sa Department of Tourism (DOT) sa milabay nga semana.

Si DOT Secretary Bernadette Romulo-Puyat, didto magpalabay sa kagabhi-on sa Modala Resort ug didto usab himoa ang tigum niini uban sa Provincial Tourism Council  sa ilang Chinese Resturant.

MALANTAW ANG DAGAT. Sa duha ka dagway sa Modala Beach Resort Hotel, malantaw gikan sa mga lawak niini ang gipunsisokan nga dagat sa Panglao, pangdani sa mga buot sa tropical landscape sa pagsuroy, bisan sa hulga sa COVID nga maayo nga pagkadumala sa Bohol. (rahc/PIA-7/Bohol) 

Gani, dala sa pang-aghat usab sa lungsod sa panglao sa pagpabukas og balik sa ekonomiya, matud ni Gonzales nga nagpaabut na sila sa inspection team sa DOT aron matan-aw sa ahensya ang compliance sa hotel sa health and safety standards nga gipatuman karon alang sa pagpugong sa pagkatag sa COVID.

Maghimo na usab ang Modala sa ilang tour package nga maglakip sa tulo lamang una  ka stops: Ang Corella Tarsiers, ang Loboc Floating Restaurant u gang Chocolate Hills, samtang dili pa piho ang pagpangandam sa hibalik sa ubang nga mga destinasyon sa bag-o nga normal.

Dugang ni Gonzales, bintaha sa mga guests sa Modala Beach Resort Hotel kay nakakabit sa Moadto Strip Mall, nga iya usab sa resort hotel.

Dili na kinahanglan pang moadto sa syudad aron mamalit kon may gikinahanglan, tanyag ni Gonzales.  

Kasamtangan nga wala pa hinuon magbukas ang kasagaran nga mga concessionaire kay natanggong usab sa COVID measures.

Apan giuna na pagpahibaw sa manager nga bukas na ang The Buzz, samtang magbukas na ang 711, 360 Pharmacy, sikat nga kan-anan nga Gilligans, Lotus Restaurant, Lechonman, Chocolate House ug kan-anan nga iya sa Ocean Suites.

Apan, bisan pa niining tanan,  wala pa molaum ang kasaligan nga tigdumala sa hotel sa Panglao nga mahibalik na ang kalagsik sa turismo sa Bohol tingali hangtud sa duha pa ka tuig.

Ang atong gibuhat karon, ang hinayhinay nga pagpa-ila og balik sa Modala  sa Panglao, dili aron makagnansya apan, pagpaila lang gayud una, butyag ni Gonzales.   

Didto sa tinuyo nga press conference nga gipatawag sa Modala Beach Hotel and Resort sa Panglao, gipadayag usab niya nga magbukas sila alang sa mga Bol-anon sa taripa nga P4,500 sa matag adlaw isip promotional introductory rate. (rahc/PIA-7/Bohol)

Source: Philippines Information Agency (pia.gov.ph)