Hiligaynon News: DOLE naghatag P9.3-M para sa TUPAD nga programa sa Capiz

SYUDAD SANG ROXAS, Capiz, Agosto 6 (PIA) – Gintugyan ni Engr. Cyril Ticao nga direktor sang DOLE – 6 ang tseke nga balor P9,365,450.00 para sa lokal nga panguluhan sang probinsya agud nga gamiton bilang “post COVID-19” nga bulig sa mga Capiznon nga wala sang regular nga trabaho kag lubos nga naapektohan sang pandemya.

 Ang pundo nga para sa TUPAD ukon Tulong Pangkabuhayan sa Atin Disadvantaged (TUPAD) nga mga mamumugon ang ginbaton ni Gobernador
Esteban Evan Contreras sa simple nga seremonya sang Agosto 5 sa Kapitolyo Probinsyal diri sa syudad sang Roxas.

Ginpahayag ni direktor Ticao nga iya ginalauman nga makabulig ang kantidad sa mga Capiznon pinaagi sa 10 ka adlaw nga pagtrabaho sang mangin mga benepisyaryo nga pagasweldohan sang P395.00 tagsa ka adlaw.

Apang iya ginpanugyan nga nagakadapat magsunod ang mga TUPAD workers sa mga “health protocols” kapareho sang social distancing ukon
pagdistansya sang indi magnubo sa isa ka metros sa isigkapareho, pagsuksok sang face mask kag masami nga paghugas sang kamot agud nga
malikawan nga malatnan sang COVID-19 nga balati-an sa pagtuman sang mga kinahanglan nga obrahon sa TUPAD nga programa.

Nahibaluan nga ang pundo ang para sa 2,371 ka mga benepisyaryo sang TUPAD sa probinsya base sa rekord sang DOLE – Capiz.

Samtang, ginpaabot naman ni Contreras ang iya nga pagpasalama sa kay Sec. Silvestre Bello III kag DOLE sa rehiyon kag probinsya sa nabaton
nga ayuda kadungan sa iya pagpasalig nga madamo nga mga Capiznon nga apektado sang krisis ang makabenepisyo sa ginhatag sang DOLE nga
pundo.

Kaupod sang gobernador sa pagbaton sang tseke amo si John Leo Marco Beldia nga amo ang hepe sang Public Employment Service Office (PESO) –
Capiz.

Samtang ang mga kwalipikado nga “displaced kag sea-based Filipino workers” sa probinsya nga apektado sang pandemya ang sarang man
makabaton sang bulig pinansyal kaangot sa Financial Assistance for Displaced and Sea-based Filipino Workers Affected by the COVID-19 ukon
DOLE-AKAP for OFWs nga programa.

Ginpabutyag ni Ticao nga bag-o lang nakabaton sang kantidad nga P4.6-million ang DOLE regional office para sa AKAP nga mga benepisyaryo sa rehiyon kon sa diin ang tagsa ka AKAP – beneficiary ang magabaton sang 10,000.00 nga cash assistance nagikan sa gobyerno. (JBG/AAL/PIA Capiz)

Source: Philippines Information Agency (pia.gov.ph)