SAN JOSE, Antique, Agosto 24 (PIA) - - Ang Department of Trade and Industry nag-umpisa run ka panagtag kang bulig sa mga magagmay nga
negosyante sa idalom kang programa nga Pangkabuhayan sa pagBangon at Ginhawa (PBG) Program.
Si DTI Supervising Trade and Industry Development Specialist Engr. Lynna Joy Cardinal naghambal nga may kabilogan nga kantidad P1,150,000
nga naaprobahan nga proyekto ang DTI sa Antique.
Ang mga benebisyaryo ginpili paagi sa rekomendasyon kang mga local nga lideres kag mga opisina sa banwa nga tinugyanan para magta-o kang
serbisyo sa mga katawhan nga biktima kang kalamidad parehas kang COVID-19.
Ginhambal man ni Cardinal nga ang iba nga mga banwa nagatao man kang prayoridad sa mga katawhan nga apektado kang insurhensya.
Sa kabilugan nga 115 ka benepisyaryo, 61 ang makabaton kang baraligya para sa tyangi para maka-umpisa liwan sanda sa andang parangitan-an
matapos dya magsirado tungod sa pandemya.
Ang DTI nagpanagtag run sa mga banwa kang San Jose, Sibalom kag Patnongon. Samtang ang iba nga mga banwa makabaton antes matapos ang
bulan kang Agosto.
Ang nabilin nga 54 ka mga benepisyaryo, nga ang anda man negosyo apektado kang COVID-19 parehas kang pagwelding, pagbulkit kang mga
goma , paghimo kang pgkaon kag iba pa makabaton man kang bulig.
Antes ipanagtag ang bulig sa mga benepisyaryo, sanda anay magatambong sa mga paghanas nga '‘entrepreneurship development, financial literacy
kag business continuity planning" para mapasiguro nga sanda mangin sampaton sa pagdumara kang andang Negosyo.
Nagalaum ang DTI nga ang dya nga mga bulig mangin mapuslanun sa mga nagagmay nga negosyante agud sanda makatibawas sa kabudlay nga dara kang pandemya. (JBG/psm/pia-Antique)
Source: Philippines Information Agency (pia.gov.ph)
0 Comments