KALIBO, Aklan, Septyembre 2 (PIA) - - - Paga akomodahon it gobyerno ro mga medical frontliners nga gin pilit nga pahalinon sa anda nga mga gina rentahan nga baeay o apartment sa tunga ku atong pag away kontra sa coronavirus disease 2019 (COVID-19), hambae ni Pangueong Rodrigo Roa Duterte ku Lunes.
Ku mga nagtaliwan nga buean, may mga report nga may mga medical frontliners nga gin pahalin sa andang mga ginadayunan nga lugar bangod sa andang propesyon ag matapos nga masayran it tag-ana nga sanda hay natapnan it COVID-19.
Sa anang public address, gin hambae ni Presidente Duterte nga obrahan gid it paagi ku gobyerno para mabuligan ro mga medical frontliners.
“Gusto ko nga i-anunsyon ra. Kamo tanan nga mga health workers nga gina pahalin sa inyong mga gina istaran – sa baeay, okun naga renta kamo it kuarto o baeay nga gina pahalin kamo sa kabangdanan nga frontliner kamo sa COVID-19 ag bangod sa andang kahadlok nga matapnan sanda. Kung raya hay manabo, tumawag eagi kamo sa opisina ni Secretary Galvez ay paga taw-an namon kamo it naga-ka-igo nga daeayunan pati pagkaon ag usuyan namon kamo it madayunan nga maeapit pa sa inyong gina obrahan,” hambae it Presidente.
Hambae pa it Pangueo nga responsibilidad it gobyerno nga buligan ro mga frontliners nga naga pakig-away sa COVID-19 ag puede sanda ibutang sa mga hotel.
Nag apelar man imaw sa mga naga pa-renta nga indi man pag-palayason ro mga medical frontliners.
“Naga tinguha gid kita nga pun-an ro mga kakueangan. Masuerte man kita nga ro Pilipinas hay haeos naka- katunga eon sa gina ekspektar it mga tawo . Duyon ta kunta. Maeooy man kamo sa mga tawo nga naga bulig tapos gina paeayas, bukon it manami ra pamati-an,” hambae it Presidente.
Suno sa Department of Health, ro Pilipinas hay may 220,619 eon nga kaso makaron, kung siin may 59,697 ka aktibong kaso; 157,559 eon ro nag mayad ag 3,563 ro namatay. (JBG/JERR/PIA)
Source: Philippines Information Agency (pia.gov.ph)
0 Comments