TAGBILARAN CITY, Sept. 26 (PIA) -- Taliwala sa mga hagit sa kinabuhi, ang Pantawid Pamilyang Pilipino Program (4Ps) partner-beneficiaries mipakita sa ilang pagkamalahutayon ug kalig-on pinaagi sa ‘Salaysay ng Buhay ng Pamilyang Pantawid.’
Ang programa nagpasiugda og story writing ug poster making contest, nga nagtinguha sa pag-duso sa positibong epekto sa programa sa pagdasig sa kinabuhi sa ilang mga partner-beneficiaries.
Napulog duha ka pamilya gikan sa nagkalain-laing lungsod sa rehiyon sa Central Visayas ang nisalmot sa kalihokan sa story writing nga miasoy sa estorya sa ilang pamilya ug giunsa paglambo sa ilang pamilya pinaagi sa pagpangilabot sa maong programa. Naghimo usab sila og poster nga mamugnaong mihulagway sa ilang estorya sa pamilya nga gisulat.
Alang sa lalawigan sa Bohol, ang pamilya Dusaran sa lungsod sa Alicia, ang pamilya Lapad sa lungsod sa Batuan, ug pamilya Dungol sa lungsod sa Trinidad ang mi-presentar sa estorya sa ilang pamilya nga namaayo ang kahimtang sa ilang pagpuyo sukad nahimo silang benepisyaryo sa 4Ps.
Ang estorya usab sa pamilya Desamparado gikan sa isla sa Bantayan, ang pamilya Castañeda sa lungsod sa Daanbantayan, ug pamilya Pacure sa lungsod sa Liloan sa lalawigan sa Cebu mitutok giunsa nila pagbuntog ang problema pinaagi sa pagtinabangay isip usa ka pamilya.
Samtang sa lalawigan sa Negros Oriental, ang pamilya Gedorio sa lungsod sa Mabinay, pamilya Sedillo sa lungsod sa Santa Catalina, ug pamilya Cafino sa lungsod sa Zamboanguita mipakita sa ilang estorya sa pamilya sa positibong mga mithi sa Pilipino sama sa gugma, respeto, determinasyon, ug panaghiusa pinaagi sa mga makahulugang aktibidad sa ilang panimalay ug sa komunidad.
Ang estorya sa mga pamilya sa 4Ps sa probinsya sa Siquijor sama sa pamilya Magsayo gikan sa Maria, ang pamilya Balwit gikan sa San Juan ug pamilya Lontayao gikan sa Siquijor Capital mipukaw sa emosyon diin ilang giasoy ang ilang kalisod ug gipakita ang mga leksyon sa kinabuhi.
Gikan sa napulog duha, ang pamilya Pacure, pamilya Lontayao ug pamilya Lapad ang mitumaw nga mga mananaog isip top three winners.
Alang sa poster, ang pamilya Desamparado ang napiling ‘best in poster design.’
“Hangtod sa hangtod akong mapasalamaton sa tanang grasya nga among nadawat sa among kinabuhi. Ang programang Pantawid kanunay nga magpahinumdom kanato dili lamang sa atong responsibilidad ngadto sa atong pamilya apan apil usab ang atong responsibilidad sa atong komunidad ug katilingban”, matud na ni Jocelyn Pacure.
Si Jocelyn Pacure nga gikan sa Barangay Yati, Liloan, mipaambit giunsa niya nakaya ang kaguol human sa kalit nga pagtaliwan sa iyang bana ug gikaya ang pagbarug isip solo parent sa iyang upat ka mga anak.
Sa pagkakaron, usa siya ka community leader, community volunteer, ug cluster leader usab sa World Vision, usa ka non-government organization (NGO).
Kalabot niini, ang Department of Social Welfare and Development (DSWD) Field Office VII mibukas sa kasaulogan sa National Family Week (NFW) niadtong Setyembre 21, 2020 pinaagi sa paglusad sa usa ka art exhibit nga nagpasundayag sa poster sa napulog duha ka pamilya sa 4Ps sa ‘Salaysay ng Buhay ng Pamilyang Pantawid.’
Gipangunahan kini nilang DSWD-7 Regional Director Rebecca Geamala ug Assistant Regional Director for Operations Shalaine Marie Lucero ug Assistant Regional Director for Administration Antonio Dolaota.
Ang ika-28 nga selebrasyon sa NFW gikan Setyembre 21 hangtod 27, 2020 nagdala sa tema nga “Tungo sa Maginhawa, Matatag at Panatag na Pamilyang Pilipino.”
Alang sa kasaulogan karong tuig, ang selebrasyon sa NFW, ang National Committee on the Filipino Family (NCFF) misagop usab sa sub-theme nga: “Mapagkalingang Pagtugon at Proteksyon sa Bawat Pamilyang Pilipino Mula sa Mga Suliranin sa Gitna ng Pandemyang COVID-19.” Nagpasiugda kini sa kamahinungdanon sa paghatag sa pamilyang Pilipino uban sa maloloy-ong pagtubag sa ‘economic shocks’ ug proteksyon gikan sa kapintasan taliwala sa COVID-19 pandemic.
Ang NFW tinuig nga selebrasyon matag ikaupat nga semana sa buwan sa Setyembre agi og pagsunod sa Presidential Proclamation No. 60 nga gi-isyu niadtong Setyembre 28, 1992. (DSWD/ecb/PIA7-Bohol)
Source: Philippines Information Agency (pia.gov.ph)
0 Comments