LUNGSOD CALOOCAN, Set. 8 (PIA) – Isinulong sa Senado ang panukalang magbibigay ng tungkulin sa mga internet service provider (ISPs) na pigilan at harangin ang anumang uri ng trafficking at child pornography.
Ito’y upang masugpo ang lumalalang insidente ng human trafficking na karamihang biktima ay mga kabataan at kababaihan, ayon kay Senador Sherwin Gatchalian, may akda ng panukalang batas.
Sa ilalim Senate Bill No. 1794, ang Republic Act No. 9208 na una nang inamyendahan ng Republic Act No. 10364 (Expanded Anti-Trafficking in Persons Act of 2012) ay paiigtingin ang mga pamamaraan ng pagtugis sa anumang uri ng human trafficking, kabilang ang pornograpiya, prostitusyon, pang-aabusong sekswal, forced labor, at pagbebenta ng laman loob.
Sa panukala, maaaring magbigay ang Regional Trial Court ng pormal na kautusan upang siyasatin o i-rekord ang mga mensahe, datos, at impormasyong nagmumula sa isang taong pinaghihinalaan o nakasuhan na ng trafficking. Ngunit bago pahintulutan ito ng korte, dapat munang patunayan ng mga law enforcer o awtoridad na mayroong krimeng naganap, isinasagawa o ‘di kaya’y binabalak dahil maaari silang makulong ng hanggang labing dalawang (12) taon kung walang pahintulot ng korte.
Isang mahalagang laman ng panukala ay ang pagbibigay mandato sa ISP at tourism-oriented establishments na i-ulat at pigilan ang mga kaso ng trafficking. Ibinibigay na tungkulin sa mga ISP ang pagharang sa anumang uri ng child pornography. Ang mga tourism-related establishments naman magbibigay ng pagsasanay sa kanilang mga empleyado upang matukoy ang mga posibleng insidente ng trafficking sa kanilang mga pasilidad at mai-ulat ang mga ito sa mga awtoridad.
Palalakasin naman ang Inter-Agency Council Against Trafficking (IACAT) sa pamamagitan ng pagsasanib pwersa sa mga kasalukuyang miembrong ng mga ahensiyang tulad ng National Bureau of Investigation (NBI), Department of Health (DOH), Department of Information and Communications Technology (DICT), Department of Transportation (DOTr), at Overseas Workers Welfare Administration (OWWA).
Sa huling ulat ng IACAT, siyamnapu’t anim (96) na porsyento ng higit limang daang (560) hatol sa mga kaso ng human trafficking mula 2005 hanggang Hunyo ngayong taon ay may kinalaman sa sex trafficking. Sa isang libo at dalawang daang (1,215) naging biktima, halos animnapung (57) porsyento ay mga menor de edad.
Samantala, pinuna rin ni Gatchalian ang pag-akyat ng mga kaso ng online sexual exploitation of children (OSEC) sa bansa mula ng magka-lockdown dahil sa COVID-19 pandemic.
Aniya, sa ulat ng Office of Cybercrime ng Department of Justice o DOJ, umabot sa halos dalawang daan at walumpung libong (279,166) mga kaso ng OSEC na naitala mula Marso 1 hanggang Mayo 24, 2020. Ito ay mas mataas ng dalawang daan at animnapung porsiyento (264%) kung ihahambing sa parehong petsa noong nakaraang taon. Inaasahang tataaas pa ito pag natapos na ang mahigpit na lockdown sa iba’t ibang lugar dahil makakapagsumbong na ang mga biktima.
“Napapanahon nang patatagin natin ang batas upang sugpuin ang human trafficking sa bansa, lalo na’t nakita nating ang mga kabataan at kababaihan ay nasa higit na panganib. Kailangan natin ng mas malakas na sistema para sa pagtugis sa mga criminal at mas malawak na pakikipag-ugnayan sa mga ahensya ng ating gobyerno upang maseguro natin ang kaligtasan ng ating mga kababayan,” ani Gatchalian. (PIA-NCR)
Source: Philippines Information Agency (pia.gov.ph)
0 Comments