Cebuano News: COVID-19 nga kaso sa Calamba nakasulod sa Oroquieta

OROQUIETA CITY, Misamis Occidental, Sep. 3 (PIA)--Nagpahigayon ug emergency meeting ang COVID-19 Task Force sa dakbayan uban ni Mayor Lemuel Meyrick Acosta para sa pagpahigayon sa contact tracing human nahibaloan nga aduna'y nakasulod nga nagpositibo sa COVID-19 sa dakbayan ug nakasuroy sa pipila ka mga lugar dinhi.

Matud pa ni Dr. Gerald Bryan Luigi Lamparas nga ang nagpositibo usa ka 26 anyos nga babaye, usa ka med tech sa Doña Maria D. Tan Hospital sa Tangub City, ug taga Libertad, Calamba, Misamis Occidental. 

Dugang pa ni Doc. Lamparas Agosto 20 nakagawas siya sa DMDT Hospital human sa 14 days nga quarantine, ug nianang mga higayonan mipauli siya sa  lungsod sa Calamba. 

Agosto 24 nianhi ang maong pasyente sa dakbayan para sa iyang mga katuyuan. Mga ala 1:30 p.m. niaadto siya sa Beast Friend dala niya ang iyang iro, ug gidawat usab sa duha ka lalaking trabahante. Human sa mga alas 2:00 p.m. niadto siya sa Provincial Treasurer's Office sa Capitol, didto siya sa information desk samtang naghulat siya sa iyang tuyo.

Dayon niadto siya sa Petron Emession Testing Center sa may alas 2:30 p.m., wala siya ninaog sa iyang sakyanan hangtud wala siya na-accomodate sa trabahante ug human sa pipila ka minutos gipulihan siya sa manobela sa usa ka tabahante aron mo test sa iyang sakyanan, human sa pagka alas 3:00 p.m. didto siya sa Land Transportation Office (LTO) aron i-submit ang iyang papel. 

Mahimong nagkumpyansa siya nga naglakaw-lakaw human siya na discharged sa isolation facility tungod kay nag-negatibo siya sa rapid test, apan Agosto 28 usa sa iyang teammates nagpositibo sa swab test hinungdan nga gipabalik sila sa DMDT hospital para sa swab test ug Setyembre 1, migawas ang resulta ug nagpositibo siya sa swab test. 

Nanawagan ang COVID Task Force ug si Mayor Acosta nga kung kinsa kadtong naa sa mga lugar nga naanhaan sa pasyente nga mag-coordinate sa mga Barangay Health Emergency Rescue Team (BHERTs) aron mapakgang ang pagkaylap sa virus sa dakbayan. 

Ug ang COVID 19 Task Force mihimo na sa contact tracing human sa meeting. (Oroquieta Community Channel/PIA Misamis Occidental)

Source: Philippines Information Agency (pia.gov.ph)