KALIBO, Aklan, Oktubre 30 (PIA) – Nagpaguwa it Executive Order (EO) No. 39 si Gobernador Florencio Miraflores it probinsya it Aklan, nga nagatao it pinakabag-o nga mga pag-amenda sa sinueondun sa pagmanehar it mga tawo sa probinsya ag sa mga aktibidadis hanungod sa turismo.
Sa pinakabag-o nga EO nga ginpaguwa ni Miraflores, ro mga indibidwal sa Aklan nga gapang-edaron 15 asta 65 anyos hay pwede eon makaguwa it andang mga panimaeay.
Sa pihak nga banda, ro mga 14 anyos paidaeum ag mga sobra 65 anyos, kaibahan ro mga may mga immunodeficiency, comorbidity ag mga iban pa nga may risgo sa ikaayong eawas, pati man ro mga nabdos hay sa gihapon ginamanduan nga indi magguwa it baeay sa tanan nga oras.
Sanda eamang hay makaguwa kung anda nga panaw hay importande gid katama kaparehas it pagbuoe it mga kinahang-eanon nga bagay, pagkaon; ukon pag-ubra it serbisyo; pagsueod sa trabaho sa mga industriya o opisina nga ginpasugtan buksan; ukon pag-atender it klase.
Para sa mga aktibidadis hanungod sa turismo, eabi na gid sa mga indi Aklanon nga mga turista nga magaagto sa Isla it Boracay, ro pre-entry requirement nga negatibo nga resulta sa reverse transcription-polymerase chain reaction (RT-PCR) test hay ginbayluhan man base sa pinakabag-o nga EO, sa indi magtemprano sa 72 oras sa dati nga 48 oras bago sa petsa it pagbyahe.
Kinahang-ean man nga ro mga turista nga maagto sa isla hay may kumpirmado nga booking sa establisyemento nga accredited it Department of Tourism.
Ro mga byahero man hay dapat magrehistro it online bilang turista para sa Health Declaration Card; raya hay makita sa website it probinsya - aklan.gov.ph ukon touristboracay.com
Par mat-a sa mga indibidwal nga halin sa guwa it Western Visayas ag plano nga mag-agto sa Boracay, siguraduhon dapat nanda nga sanda hay maeapag sa Godofredo R. Ramos Airport sa Caticlan, Malay, dahil raya eamang ro gintaeana nga airport para makasueod sa isla.
Nagapadumdum gid ro Gobyernong Probinsyal it Aklan sa mga turista nga sundon gid ro mga nahambae nga mga pre-entry requirements; dahil kung indi, sanda ra hay pwede gid mabalibaran nga makasueod it Boracay.
Halin sa una nga uman nga nga pagbukas it Isla ku Oktubre 1, 2020 asta Oktubre 22, 2020, narekord it Malay Municipal Tourism Office, nga may kabilugan 1,4437 nga pag-abot it mga turista sa Boracay.
Suno man sa pinakabag-o nga EO it gobernador, ro operasyon it mga lisensyado nga bueangan ag paghiwat it mga bueang hay ginapasugtan eon pero hay dapat strikto nga magtuman sa mga health ag safety protocols; ag mga implementing guidelines halin sa Department of the Interior and Local Government (DILG). Pero, ro mga local government units ro may pinal nga desisyon kung anda ra pagasugtan sa anda nga banwa.
Ro EO 39 hay gin-isyu ag nagkabisa ku Oktubre 19, 2020. (JSC/SQP/PIA6 Aklan)
Source: Philippines Information Agency (pia.gov.ph)
0 Comments