Cebuano News: Bong Go, DSWD may tabang sa market vendors sa Ubay

KINI ANG UNA, NAA NAY IKADUHA. Si Senador Bong Go personal nga mingbukas sa marker sa Malasakit Center sa Gallares Hospital duha na ka tuig ang milabay samtang, pinaagi sa iyang online presence, gipangunahan usab niya ang pagbukas sa ika duha nga Malasakit Center sa Ubay, diin siya nanghatag usab sa dugang serbisyo. (PIA Bohol)

TAGBILARAN CITY, Bohol, Oct. 28 (PIA) -- Kapin sa 1,500 ka mga namaligya sa merkado sa Ubay ang nakadawat og hinabang gikan sa kagamhanan ug sa Buhatan ni Senador Bong Go, Octubre 23-24 sa seremonyas nga nagatamud sa social distancing aron likayan ang coronavirus disease (COVID) didto sa tulo ka hugna nga pagpanghatag sulod sa Ubay Municipal Gymasium.

Gawas sa gihatag nga mga pagkaon, gipang-apud-apod sa mga sakop sa Buhatan ni Senador Bong Go ang face masks, face shields, mga bisekleta ngadto sa mga naglisud na og sakay sa nadyutay nga mga sakyanan pasahero-an nga nagdagan ug mga tablets sa pili nga mga benepisaryo nga mga kabataan aron may magamit sila sa ilang online classes alang sa blended learning modality nga gisagop sa Department of Education.

Sa kinatibuk-an nga 1,573 ka mga mamaligyaay sa merkado sa Ubay, 400 niini ang mingdawat sa hinabang sa unang adlaw, samtang 1,173 usab ang mingdawat sa susamang hinabang sa duha  ka hugna nga pagpanghatag sa sunod nga adlaw.

Matud pa ni Senador Go, kinsa nakig-uban sa mga taga Ubay pinaagi sa online presence, ang kalisud sa pagpanginabuhi ilabi na sa mga namaliya sa mga merkado, angay lang hatagan og dyutay nga alibyo sa ilang pagpaningkamot.

Sa iyang hatag nga mga tablets, tugon sa senador ngadto sa mga estudyante nga mingdawat niini nga magtarong sa pag-eskwela tungod kay ang  edukasyon maoy puhunan sa kinabuhi. 

Gawas sa mga tinugyanan sa Buhatan sa senador, nanghatag usab ang mga tinugyanan sa Department of Social Welfare and Development (DSWD) sa tabang pinansyal alang sa mga individuals in crisis situations (AICS).

Gawas sa atong buhatan, anaa usab ang mga kaubanan nato sa goberno aron magserbisyo. Dili kami mohunong aron matabangan kamo labi na sa panahon nga gikinahanglan nato ang tinabangay ug inunongay aron malingkawasan kining pagsuway karon, saysa sa senador.

Ang senador naghimo sa kalihukan dungan usab sa pagbukas sa Malasakit Center didto sa Don Emilio del Valle Memorial Hospital sa Ubay Octubre 23.

Ang Malasakit Center usa   ka one-stop shop diin ang upat ka mga ahensya sa goberno nga tigtabang sama sa DSWD, Department of Health, Philippine Charity Sweepstakes Office ug PhilHealth  gipahimutang ubos sa usa  ka ospital, ug mas dali nga makaserbisyo sa senior citizens, PWDs ug mga kabus nga nasakit.  (rahc/PIA-7/Bohol)

Source: Philippines Information Agency (pia.gov.ph)