TAGBILARAN CITY, Oct. 21 (PIA) -- Nagpabilin gihapon'g gipahamtang sa Bureau of Fisheries and Aquatic Resources (BFAR) ang shellfish ban sa mga kabaybayonan sa lungsod sa Dauis ug syudad sa Tagbilaran.
Sigun sa BFAR Shellfish Bulletin No. 22 series of 22, nagpositibo gihapon sa paralytic shellfish poison o red tide toxin ang mga samples nga nakuha sa kabaybayonan niini.
Tungod niini, nipasidaan ang BFAR batok sa pagkaon og mga kinhason nga makuha ning mga dapita.
Kini nagpasabot nga tanang klase sa kinhason ug acetes species (alamang) nga makuha sa mga lugar nga may red tide, dili luwas nga kaonon. Dili kini angay kuhaon, ibaligya ug kaonon.
Kahinumdoman nga ang red tide alert sa lungsod sa Dauis ug syudad sa Tagbilaran nagsugod sukad pa niadtong Marso 2018.
Base sa Shellfish Bulletin sa BFAR, ang mga mosunod nga lugar nagpositibo usab sa paralytic shellfish poison: parte sa Puerto Princesa Bay sa Puerto Princesa City, Palawan, Milagros sa Masbate, Tambobo Bay sa Siaton Negros Oriental.
Apil usab ang parte sa kadagatan sa Daram Island lungsod sa Zumarraga, Irong-Irong Bay ug San Pedro Bay sa Western Samar.
Apektado usab apil ang Cancabato Bay sa Tacloban City, Leyte, Matarinao Bay sa Eastern Samar, Balite Bay sa Mati City, Davao Oriental ug Lianga Bay ug Hinatuan sa Surigao Del Sur. (ecb/PIA7-Bohol)
Source: Philippines Information Agency (pia.gov.ph)
0 Comments