SYUDAD SANG ILOILO, Oktubre 21 (PIA) – Nagakadapat sang padayon nga pagsuporta kag pag-ulikid sang mga manunudlo kag mga ginikanan sa mga estudyante samtang nagatuon sila sa idalom sang nagkalain-lain nga mga learning delivery methods.
Suno kay Dr. Amelita Pitalgo, hepe sang Education Support Division sang DepEd-6, nga indi dapat pagpabudlayan ang mga estudyante sa subong nga tion tungod may ara pa sang pandemya.
Dugang niya, nagakadapat kag kinahanglan nga magtuon kag magsabat sang module ang mga estudyante nga sila lang.
Dapat magabantay lang ang mga ginikanan kon gina-obra man gid sang ila mga bata ang mga dapat sabton nga mga module.
Ang madamo nga competencies ginbuhinan sang DepEd kag ginlimitahan sa “Most Essential Learning Competencies” para makatuon ang mga bata nga sila lang kag may gamay lang nga panuytoy sang mga ginikanan.
Nagsugod ang klase sang Oktubre 5 sa idalum sang Learning Continuity Plan nga ginsugoran obra sang DepEd sang Abril.
Tungod sa coronavirus disease 2019 (COVID-19), naga-gamit ang DepEd sang online learning, modular, blended learning, kag radio ukon tv-based instruction para mapadayon ang pagtudlo kag pag-eskwela sang mga kabataan. (JSC/CBA/PIA6)
Source: Philippines Information Agency (pia.gov.ph)
0 Comments