SAN JOSE, Antique, Oktubre 21 (PIA) - - Ang Philippine Identification System (PhilSys) natalana nga magarehistro ka 111,125 nga mga Antiqueño nga manaba and kita para sa kadya nga tuig.
Si Antique Provincial Statistics Officer Jesus F. Escote Jr. naghambal nga ang dya nga lihok nagatuyo sa pagta-o kang ID para mangin basehan kang pagkilala kang sangka tawo kang ang unahon kadya nga tuig ang mga pamilya nga manaba ang kita tungod sanda pirme ang wara pa ti ID nga ipakita.
Ang mga ngaran ka una nga listahon ginbuol sa Listahanan III nga ginhimo kang Department of Social Welfare and Development kun sa diin ang mga pamilya nga may manaba ang kita ang unahun para mangin mahulas ang andang pagtransaksyon sa mga ahensya kang gobyerno, banko kag iba pa.
Gani ginhingyo gid ni Escote ang kooperasyon kang tanan para sa kadarag-an kang dya nga proseso nga nag-umpisa kang Oktubre 12 hasta sa Disyembre 30, 2020.
Para sa pungsudnon nga tinutuyo ang PSA nagatuyo sa pagrehistro ka P5,000 nga mga katawhan para sa kadya nga tuig.
Ginpasiguro kang PSA nga ang tanan nga impormasyon nga matipon sa amo nga survey magapabilin nga pribado suno sa probisyon kang Data Privacy Act or Republic Act 10173.
Ang mga naga survey magatuman man sa health protocol samtang sanda nagapatigayon kang survey parehas kang pagsuksok kang face mask, faceshield, paghugas nga alima pirme nga may tubig kag habon ukon alcohol kag pagmentinar kang husto nga distansya samtang nagapamangkot.
Ang mga enumerators may mga ID man kag naka uniporme para madali sanda makilala.
May 21 ka Registration Officer II kag 85 Registration Officer I nga magapatigayon kang pagsurvey sa bilog nga probinsya.
Ginpa-athag ni Escote nga ang PhilSys ID gamiton lamang bilang basehan sa pagkilala sa sangka tawo kag and mga ID nga halin sa sari-sari nga ahensya kang gobyerno parehas kang driver’s license, PhilHealth, SSS, PAGIBIG, GSIS kag iba pa magapabilin nga balido. (JBG/PSM/PIA-Antique)
Source: Philippines Information Agency (pia.gov.ph)
0 Comments