CORTES, Bohol, Nov. 22 (PIA) -- May tulo na ka adlaw nga ang mga menor de edad ug mga edadran na ilabi na naidtong molapas ang panuigon sa 65, mahimong makagawas sa ilang mga panimalay sa usa ka semana, basta lamang importante gyud ang ilang tuyo sa gawas.
Gawas niini, padayon nga ipatuman sa Bohol ang general rule nga dili gyud magpagawas-gawas sa mga menor de edad o 15 anyos paubos ug mga senior citizens ilabi na sa 65 anyos pataas, kon magsuroysuroy lang.
Kini hinuon nga unod sa bag-ong Executive Order No. 52-A, dili magamit sa mga tawo nga naay daan na nga gihambin nga sakit, mga napaluya na ang panalipod sa lawas ug sa mga buntis.
Sa bag-ong giha-on nga Executive Order No. 52-A nga gilagdaan ni Gobernador Arthur Yap ug nahimong epektibo niadtong Nobyembre 20, 2020.
Ang desisyon nga ipagawas ang Executive Order 52-A, epekto kini sa daghan na nga executive order nga giluwatan sa gobernador aron paglatid sa mga sumbanan sa paglibkas sa home quarantine sa mga menor de edad nga may dako nga posibilidad nga sa ilang pagsuroy-suroy, mao nay makadala sa kagaw nga mananakod.
Sa kaso sa mga edaran na, sila kadtong may mas luya nga depensa sa lawas ug labing dali nga matakdan sa sakit, mao nga kinahanglang ipalayo sa kahigayunan alang niini.
Kahinumduman nga ang pag-hikaw sa mga kabatan-onan ug sa mga edaran na nga makagawasgawas una nga gituki sa Executive Order No. 16 nga gipagawas sa gobernador niadto pang buwan sa Marso.
Unod sa nahisgutang mandu sa gobernador ang 24-oras nga estriktong home quarantine alang sa nahisgutang mga tawo.
Pipila ka adlaw ang minglabay, dihang namatikdan sa gobernador nga daghang mga menor sa edad ug senior citizens nga nanguma ug nangisda alang sa pagkaon sa banay, ang napagan sa mandu, gipagawas dayun ang Executive Order No. 16-A nga nagpa walat-labuy sa mga kabataan ug katiguwangan nga nanarbaho alang sa pagkaon.
Kapin sa usa ka buwan, pinaagi sa Executive Order No. 28 nga gilagdaan niadtong Abri 29, si Gob Yap una nga milibkas sa home quarantine alang sa 65 anyos pataas ug mga kabataan.
Matud sa EO 28, ang mga nahisgutan nga senior citizens tugotan na nga makagawas sa mga adlaw ngaMartes, Miyerkoles ug Huwebes gikan sa alas 6:00 sa buntag nagdto sa alas 6:00 sa hapon.
Sa mga menor de edad, gilibkas alang kanila ang curfew ug makagawas sila sa Lunes ug Biyernes gikan sa alas 6:00 sa buntag ngadto na sa alas 6:00 sa hapon, basta nga sila kuyogan sailing mga ginikanan o legal nga guardians.
Wala magdugay, giusab na usab ang sumbanan pinaagi sa Executive Order No 28-A nga nagmandu nga ang mga menor de edad adto na makagawas sa adlaw nga Biyernes ug Sabado, samtang ang mga 65 anyos pataas, makagawas sa matag adlaw nga Martes, Miyerkoles ug Huwebes sa sumanang mga oras sa unang executive order.
Niadtong miagi nga semana, lain nga executive Order ang gipagawas nga nagpalig-on sa general rule sa pagpabiling naa sa mga balay ang mga menor de edad ug senior citizens.
Apan, niadtong Nobyembre 20, us aka semana human napagawas ang EO 52, ang League of Municipalities of the Philippines miduso og us aka resolusyon nga nagsugyot sa pagsagop sa bag-ong mga adlaw nga mahimong makagawas ang mga ubos pa sa 15 anyos ug kapin sa 65 anyos, bisan sa province-wide curfew.
Tungod niini, gipagawas na usab ang Executive Order No. 52-A.
Segun sa EO 52-A, bisan sa general rule, ang mag menor de edad nga 15 anyos paubos, mahimo na sila makagawas sa ilang mga home quarantines sa adlaw nga Biyernes, Sabado ug Domingo, samtang kadtong mga 65 anyos pataas, makalingkawas sa home quarantine matag adlaw nga Miyerkoles, Huwebes ug Domingo. (rahc/PIA-7/Bohol)
Source: Philippines Information Agency (pia.gov.ph)
0 Comments