MALAYBALAY CITY, Nobyembre 12 (PIA)—Aprobado na sa Sangguniang Panlalawigan kon SP ang Ordinance No. 2020-032R o mas naila nga “An Ordinance Installing A Led Digital Time and Information Board following the Philippine Standard Time at any Conspicuous Public Places.”
Kini nga ordinansa giduso ni Board Member Lorenzo L. Dinlayan, Jr. diin nagmando sa mga opisyales sa tanang munisipyo ug syudad ning probinsya nga i-‘align’ ang tanang mga orasan sa opisina aron insakto ang paghatag sa mga impormasyon, kalihukan, ug uban pang kasayuran kabahin sa plano ug mga kalihukan sa tibuok probinsya.
Pamaagi kini aron mas masabwag ug masayran sa publiko ang mga proyekto, programa ug mga kalihukan sa kagamhanang probinsyal, nga diin kaniadto, mga empleyado sa Kapitolyo lang ang kadaghanan nga nakahibalo.
Sa pagsiguro nga ang mga kalihukan ug impormasyon tukma ug dungan nga mahibal-an sa tanang katawhan sa probinsya, rason nga gipalabang ang “The Bukidnon Synchronized Time and Information Ordinance.”
Subay sa maong Ordinansa, gitinguha nga matukod kini diha sa Provincial Capitol Grounds, sa nagkadaiyang mga lungsod ug syudad, sa mga barangay, ug uban pang pampublikong lugar sulod sa lalawigan.
Ang Provincial Government sa Bukidnon, sa pagpanguna ni Governor Jose Ma. R. Zubiri, Jr, kanunay nag-ila kung unsa ka-importante ang impomasyon. Iyang gi-subli pagpasabot nga tulubagon sa kagamhanan ang paghatud sa mahinungdanon ug tukmang kasayuran ngadto sa katawhan. (PGO-PAIA/BGE, PIA Bukidnon)
Source: Philippines Information Agency (pia.gov.ph)
0 Comments