ILIGAN CITY, Nobyembre 12 (PIA) - Aron paspas nga makapahigayon sa Tuberculosis Test kon TBTesting ang City Health Office, ang lokal nga kagamhan sa Iligan, pinaagi sa Iligan Medical Internist,nakadawat og duha ka set sa GeneXpert machine gikan sa Department of Health (DOH) ug Philippine Business and Social Program (PBSP), usa ka non-government nga organisasyon.
Ang duha ka makinarya didto gibutang sa gitawag nga end-to-end nga mga barangay sa Iligan. Ang upat ka modyul nga makina gitunol sa mga Barangay sa Hinaplanon ug Tomas Cabili aron ma-test ang mga residente gikan sa sidlakan (east) ug kasadpan (west) nga bahin sa syudad.
Si Jhun Ronald Gilbolingo, kawani sa DOH Region 10 nga usa sa TB technical staff ug miyembro sa PBSP, miingon nga ang GenXpert machine makahimo’g mga ‘Test’ sa upat ka sampol nga ‘sputum’ kon plema sa matag higayon, ug mogawas ang mga resulta pagkahuman sa duha ka oras.
"Mao ni siya'y latest nato nga machine nga maka-detect sa atuang TB. Ug dili lang TB, kon dili ang atuang resistance pattern sa atuang Rifampicin nga tambal, in which ang Rifampicin nato mao na siya'y strongest nga klase sa tambal nga maka-defeat sa TB," matud niya.
Dugang pa ni Gilbolingo nga ang PBSP maoy mo-supply sa mga cartridges nga isulod sa makina diin butangan ug mahibal-an ang mga sample sa plema.
Gawas sa pag-detect kon dunay TB ug resistance pattern determination sa Rifampicin, mahimo pud magamit ang makina sa GeneXpert aron sa pagsusi sa viral load sa Human Immunodeficiency Virus (HIV) ug COVID-19 nga testing.
"Kini nga makinarya parehas sa makina nga gigamit sa atong Northern Mindanao Medical Center (NMMC) aron mahibal-an ang mga pasyente kung positibo sa COVID-19, apan kinahanglan og usa ka laboratoryo nga accredited sa level 2 biosafety aron tugotan kini nga pamaagi," dugang pa ni Gilbolingo.
Isip lakip sa mga kalisud sa ekonomiya ug ‘social adversities’ nga dala sa COVID-19 pandemic sa syudad, gi-ila usab sa Bise mayor nga si Jemar Veracruz ang TB isip 'seryoso' nga sakit tungod kay parehas sa COVID-19 ang mga impeksyon niini.
"Samtang magpadayon ang atong kampanya kontra sa COVID, dili nato kalimtan ang uban pang mga kampanya, sama sa kampanya kontra TB. Parehas kini nga grabe nga sakit. Nakita nato ang pagkaseryoso nga mahimong resulta sa sakit sa mga tawo," matud pa ni Veracruz
Gi-report pud ni Veracruz ang mga datos kon statistics sa TB nga gihatag sa World Health Organization diin nagpakita kini nga matag segundo dunay natakdan sa TB, ug matag 10 ka segundo naay namatay sa TB.
Tungod niini, nanawagan ang Bise mayor sa mga residente nga pahimuslan ang teknolohiya nga gihatag sa duha ka barangay alang sa mas sayo nga pag-detect kon dunay TB aron mahatagan dayon ug tambal.
"Andam na ang laboratoryo nato, ang mga makina sa GeneXpert nga naa sa ato andam na, andam nasad ang mga tawo, ug ang among mga health personnel sa lungsod andam na nga mo-atiman sa ila," miingon si Veracruz. (BGE/PIA-ICIC)
Source: Philippines Information Agency (pia.gov.ph)
0 Comments