ILIGAN CITY, Nob. 10 (PIA)—Nanawagan ang Iligan City Health Office (CHO) sa mga ginikanan nga magpabakuna ang ilang mga anak kontra sa sakit nga tipdas.
Giklaro ni Iligan City Health Officer Dr. Cherlina Cañaveral atol sa COVID-19 virtual presser nga ang tipdas usa ka makatakod nga sakit sa “respiratory” nga hinungdan sa usa ka virus.
"Amidst the COVID-19 pandemic, atong i-share nga dili lamang ang COVID-19 ang infectious disease kun dili duna pay ubang infectious diseases nga dapat pud nato tagaan sa panahon ug kinahanglan kita ug mga precautions, especially sa atong mga vulnerable groups which are the children below 5 years old," miingon siya.
Gisaysay usab ni Dr. Cañaveral nga ang tipdas usa ka peligro nga sakit nga motakboy sa mga bata tungod kay possible kining mo-resulta sa komplikasyon sama kalibanga, “otitis media, pneumonia, conjunctivitis” ug uban pa.
Sumala pa niya, ang labing epektibo nga paagi aron malikayan ug batokan ang sakit nga tipdas mao ang pagpabakuna.
"Matag tawo delikado sa tipdas labi na ang wala pa naka undergo sa vaccination' (kadtong wala pa nakaagi sa bakuna)," dugang sa city health officer.
Gipasalig ni Dr.Cañaveral sa mga ginikanan nga ang bakuna sa tipdas luwas ug dili delikado alang sa ilang mga anak.
“Ayaw kamo kahadlok kay kining ‘measles vaccine’ safe kini. Dugay na ni gigamit sa atong mga health centers. Dili ni bag-o nga immunization. Ginahatag ni nato karon only as supplemental immunization para ma-avoid nato ang measles outbreak," dugang pa niya.
Niadtong 2019, ang report sa Iligan CHO miingon nga naay 186 ka mga kaso sa tipdas, pero karon nga tuig, 30 nalang ka kaso sa tipdas ang natala sa Iligan City Health Office partikular sa bulan sa Oktubre ning tuig. (ZDJ/PIA-ICIC)
Source: Philippines Information Agency (pia.gov.ph)
0 Comments