MALAYBALAY CITY, Nobyembre 11 (PIA)—Ang Provincial Health Office (PHO) sa probinsya sa Bukidnon magpahigayon ug ‘Responsible Parenthood-Family Planning (RP-FP) Outreach Program’ sa lungsod sa Impasugong karong umaabot Nobyembre 24-25 ug sa Manolo Fortich, sa Disyembre 1-2, ning tuig 2020.
Matud pa ni Maria Elena Dandasan, Provincial Family Planning Program Coordinator sa PHO, nga tumong sa kalihukan nga mahatagan ug pagtagad ang panglawas sa kababayen-an aron malikayan ang ‘maternal and neonatal death’. Segun sa Maternal and Neonatal Death Statistics 2019 Annual Report sa Provincial Health Office, naa sa dose (12) ang ihap sa maternal death ug sais-syentaý sais (66) ang neonatal death.
Base usab sa rekord sa PHO sa “number and proportion of Women of Reproductive Age (WRA) as of 2nd Quarter” tuig 2020, mikabat sa 1,846 ka mga babaye nga nag-edad sa 15 hangtud 49 anyos ang gustong magplano sa pamilya pero walay gigamit nga pamaagi aron dili usa magmabdos.
Kini ang hinungdan nga sunod-sunod ang gipahigayon nga ‘outreach program’ sa PHO uban sa pakig-alayon sa mga Local Government Units, Department of Health-Region 10, Population Commission, ug ang U.S. Agency for International Development kon USAID.
Una nang napahigayon ang RP-FP Outreach Program sa mga lungsod sa Baungon, Quezon, Dangcagan, ug Sumilao diin gilusad sa PHO ang paghatag-kasayuran (information dissemination), pagtambag (counselling), pagsusi (assessment), pagtaod sa ‘Progestin-only Subdermal Implant (PSI)’ ug ang ‘skills training’ sa pagtaud ug pagtangtang sa PSI. (Maria Elena A. Dandasan, PHO/PIA-Bukidnon)
Source: Philippines Information Agency (pia.gov.ph)
0 Comments