DAKBAYAN SA BUTUAN, Nob. 23 -- Pinaagi sa Sanggunian Resolution No. 506-2020 nga gi aprobahan na sa Sangguniang Panlalawigan, gihatag pagtugot si Gobernador Dale B. Corvera nga ibalhin ang pondo sa munisipyo sa Magallanes, ning probinsya, sa kantidad nga P3,000,000.00 alang sa proyekto nga pagsuplay ug pagbutang sa Solar Street Lights.
Sa pagtimbang-timbang niini, nakita sa Committee on Finance and Appropriation diin tsirman si Bise Gob. Ramon A.G. Bungabong, nga ang lungsod sa Magallanes gi prayoridad niini ubos sa Annual Investment Program (AIP) sa pagpatuman sa maong proyekto nga Solar Street Lights aron mahatagan og kahayag ang kadalanan panahon sa gabii, aron sayon ug luwas ang mga magbiyahe ug ingon man mga ginsakupan sa munisipyo.
Tungod sa kakulangon sa pondo ang mga opisyales sa munisipyo sa Magallanes naghangyo og suporta gikan sa probinsya pinaagi sa Provincial Governor alang sa pagpatuman sa nasangpit nga proyekto.
Ang pagbalhin sa pundo sa maong proyekto nga nahiuyon sa paghatag sa mga serbisyo ug pasilidad sa mga ginsakopan sa probinsya aron mapauswag ang kaluwasan ug kahan-ay sa lugar, gipadali sa gobernador aron ma-implementar dayon kini.
Ang Provincial Government sa Agusan del Norte ug ang Municipal Government sa Magallanes, mopirma sa MOA nga naglangkob sa termino ug kondisyon, ingon man ang tagsatagsa nga responsibilidad sa matag partido sa pagbalhin sa nasangpit nga pondo, ingon man ang pagdumala ug paggamit sa nasangpit nga pondo alang sa epektibo nga pagpatuman sa proyekto.
Ang pag pirma sa kasabutan nahisubay ubos sa Section 465 (vi) of RA 7160 sa Local Government Code of 1991.
Ang maong lakang giaprobahan sa SP pinaagi sa pagpaningkamot ni Vice Governor Bungabong. (Ramil L. Pasco, LGU Agusan del Norte/PIA Agusan del Norte)
Source: Philippines Information Agency (pia.gov.ph)
0 Comments