KALIBO, Aklan, Disyembre 4 (PIA) – Ro mga turista nga naga adto sa isla it Boracay hay euwas sa COVID-19 nga pandemya.
Raya hay suno kay Virgilio Sacdalan, Vice Chairman it Compliance Association of Boracay ukon (CAB), sa anang presentasyon bilang sambilog sa mga “resource persons” it ginpatigayon nga ikatlo ag pinaka ulihi nga paghiwat it Dagyaw Town Hall Meeting 2020 kon siin gin imbitar nana ro tanan nga mag-adto sa Boracay bangud nga ro tanan nga mga sueundanon hay ginapatuman agud maabangan ro pageapta it COVID-19 idto.
Ro pagkangay ngara ni Sacdalan hay bangud sa anang obserbasyon nga umpisa ku ginbuksan ro isla sa mga turista ku Hunyo 2020 para sa mga bisita nga halin sa Western Visayas, ag pagbukas pa gid kara ku Oktubre 2020 sa mga turista nga halin sa ibang parte it Pilipinas, owa gid it halista nga bisita nga nagmasakit sa COVID-19.
Ginpakita ni Sacdalan sa anang presentasyon nga ro COVID-19 nga “transmission” hay halin sa mga Locally-Stranded Individuals (LSIs), Returning Overseas Filipinos (ROFs), ag Authorized Persons Outside Residence (APORs), ag mga residente nga naka byahe.
Ginhambae ni Sacdalan nga tanan nga “transmission” hay halin sa komunidad ag anda kara nga mga hapaeapitan. Raya, suno kana, hay nagakahueugan nga epektibo ro “business protocols” pero dapat hay mangin maid-id man nga pag istudyo kara ro gobyerno agud mabuligan man ro mga negosyante nga ma protektahan ro andang negosyo, mga empleyado ag mga bisita.
Antes ro pandemya, ginsaysay ni Sacdalan nga nagabaton ro Boracay it 5,000 nga bisita kada adlaw pero makaron hay may 50 hasta 100 eang ro kasueod sa isla kada adlaw, ukon 2 porsyento.
Sa pihak it mga panghangkat, ro mga tawo sa isla hay padayon nga nagatinguha ag naga implementar it mga stratehiya agud makabangon ro turismo idto.
Nagapati sanda nga paagi sa Bayanihan ukon Dagyaw it gobyerno, mga negosyante ag komunidad sa pagpatuman it mga sueundanon sa ikaeuwas sa COVId-19, maduea eon ro pandemya ag makabawi ro turismo.
Sa makaron, ginhambae ni Sacdalan nga indi dapat kahadlukan ro mga turista bangud antes sanda mag adto sa mga destinayon nanda hay nag obserbar sanda it ginakinahangean kanda nga “health protocols.”
Ro CAB hay gintukod ku 2018 it Department of Environment and Natural Resources (DENR) agud organisahon ro sektor it negosyo sa isla nga nakatuman sa ginakinahangean it Task Force agud makabukas it uman kat ginpagsarado ra para sa rehabilitasyon.
Makaron, nangin aktibo man ro CAB sa pagkoordinar sa Boracay Inter-Agency Management Group (BIAMG) ag Department of Tourism (DOT) sa mga dapat obrahon sa tiyempo ngara nga may pandemya. (JSC/VGV/PIA6 Aklan)
Source: Philippines Information Agency (pia.gov.ph)
0 Comments