KALIBO, Aklan, Disyembre 30 (PIA) -- Ro gobyerno lokal it Kalibo ro magapamuno sa pagpatigayon it mga aktibidades para sa Kalibo Sto. Nino Ati-atihan Festival 2021.
Raya ro pinakaunang kahigayunan sa pilang dinag-on nga nagtaliwan nga ro banwa mismo ro magapamuno sa aktibidades bangud ku mga nag agi nga lokal nga administrasyon, ro mga aktibidades hay ginbuytan it mga “management boards” ag “foundation.”
Sa masueod ngara nga dag-on nga aktibidades, may mga alternatibo nga mga aktibidad nga igapresentar nga ayon man sa pagsunod sa mga “health protocols’ nga gintaeana it gobyerno sa pag-abang sa pageapta it COVID-19 nga pandemya.
Sa pihak it mga “adjustments” sa pagtuman sa mga “protocols,”ro banwa hay magapatigayon man it pilang mga regular nga aktibidad sa pagselebrar it kapyestahan ni Sr. Sto. Nino, pareho ku “Search for Miss Kalibo Ati-atihan.”
Sa tyempo ngara ugaling hay pagapatigayunon ro paindis-indis paagi sa “virtual” nga kompetisyon kon siin ro mga kandidata hay magapresentar sa raya nga pamaagi ku andang Production Number, Festival Costume, Swimsuit, Evening Gown, Social Media Popularity, ag Interview.
Maga presentar man ro kada kandidata it anda nga Advocacy Project. Kada barangay hay dapat may sambilog nga representante.
Ro mga premyo sa magadaeaog hay eain man makaron ro pagabue-an, ag mayad-ayad man ro pagabutangan kara.
Sa kauna-unahan nga kahigayunan, ro premyo it tatlong nagapangunang magadaog hay sa porma it Barangay Development Project Fund, kon siin ro iga deklarar nga Miss Kalibo Ati-atihan 2021 hay magabaton it P500,000.00 nga balor it Barangay Project Fund; ro 1st runner-Up hay magabaton it P300,000.00 Barangay Project Fund; ag ro 2nd Runner-Up hay magabaton man it P200,000.00 nga balor it Barangay Project Fund.
Ro Kalibo Sto. Nino Ati-atihan Festival hay ginaselebrar kada dag-on sa ikatlong domingo it Enero. (JSC/VGV/PIA6 Aklan)
Source: Philippines Information Agency (pia.gov.ph)
0 Comments