Cebuano News: 2 ka negatibong RT PCR aron APOR, turista makagawas sa tourist bubble

TAGBILARAN CITY, Bohol, Dec. 18 (PIA) -- Human sa duha ka negatibo nga resulta sa pag-ila kon may coronavirus disease (COVID-19) o wala, gitugotan na ang mga turista ug Authorized Persons Outside Residence (APOR) nga makasuroy gawas sa ilang tumbok nga mga lugar adtoan nga sulod sa giingon nga tourist bubble.

Hinuon, wala pay gipagawas nga sumbanan nga mahimong ipatuman alang sa mga locally stranded individuals ug namauli nga Overseas Filipino Workers (OFWS) hangtud nga ikakonsulta pa kini sa gobernador ngadto sa mga mayor, butyag ni Provincial Administrator Atty Katherin Pioquinto, niadtong Biyernes.  

BISAN PA SA NEGATIBO NGA RT PCR. Obligado pa gihapon ang mga turista nga motamud sa health and safety protocols sa ilang pag-abut dinhi, bisan pag may negatibo na nga RT PCR sa ilang pagsulod dinhi. Kon makalabang sa lima ka adlaw ug obligadong himoan sa RT PCR na usab, kinahanglang negatibo kini aron maka suroy na sila sama sa mga taga Bohol. (rahc/PIA-7 Bohol)

Ang Executive Order No. 57 nga gilagdaan ni Gobernador Arthur Yap niadtong Disyembre 16, 2020, nagpausab na usab sa mga lagda alang sa mga mosulod nga turista sa Bohol ug mga APOR nga may mga importante nga trabahoon dinhi.

Sa bag-ong Executive Order, dinhi napatik ang mga lagda ug mga sumbanan, alang lamang sa mga turista nga motambong sa mga tigum, incentives, komperensya ug kombensyon ug exhibits ug mga events sama sa birthday, kasal, lubong, mga free independent travelers ug mga APOR nga mosulod sa Bohol.

Unod sa Executive Order No 57 nga gipagawas ni Gob Arthur Yap aron ikapatuman na sa labing dali nga panahon ang pagpa-usab sa nahauna nga Executive Order No 53, nga nagpatin-aw sa konsepto sa tourist bubble, ug sa Executive Order 54 nga nag pasayon ug nagpahiusa sa mga pamaagi sa kwarantina sa mga mosuod sa Bohol.

Matud sa gobernador sa bag-ong EO, kini nahasubay sa National Action Plan nga nalatid sa InterAgency Task Force on Managing Emerging Infectious Diseases Resolution No 51 aron bukan pa ang ekonomiya apan ibalanse ang kasanihan ug ang mga ekonomikanhong katuyuan.

Kahinumduman nga segiun sa Executive Order Now 53 nga nagpasabut sa konsepto sa tourist bubble sa Bohol, ang tanan nga turista nga motambong sa mga meetings, incentives, conventions ug conferences ug exhibits uban ang events, kinahanglang may negatibo nga RT PCR results, may mga hotel bookings na, tour bookings ug naandam na ang ilang mga adto-anan samtang may nahuptan na sila nga Quick Response Codes.

Kon makakompleto na sa gikinahanglang rekisitos, makasulod sila sa Bohol apan limitado lamang ang ilang lakaw gikan sa tugpahanan paingon sa isolation facility ngadto sa trabahoan, balik sa facility.

Wala sila tugoti nga mosimang sa ubang lugar nga wala masulod sa tourist bubble.

Sa laing bahin, sa Execuive Order No 54, sa kabahin sa mga APOR, mahimo man silang makasulod basta dili na sila milikoy pa sa ubang lugar gawas sa trabaho-an ug uli-anan.

Dinhi, namatikdan sa mga tinugyanan nga may mga turista ug APOR nga ganahan pang magdugay aron mosuroy sa Bohol.

Niini, bisan pa kon nakapakita na sila sa negatibo nga resulta sa RT PCR 72 oras sa wala pa sila mobyahe paingon sa Bohol, human sa lima nil aka adlaw nga ania dinhi, kinahanglan silang magpakuha usab og swab test.

Kon makakuha sila sa ikaduha nga negatibo nga RT PCR result human sa lima ka adlaw nila nga pagpuyo dinhi, segun sa Executive Order, katugotan na sila nga mosuroy gawas sa ilang tourist bubble. (rahc/PIA-7/Bohol)

Source: Philippines Information Agency (pia.gov.ph)